Беларускую Праваслаўную Царкву запрасілі выступіць на святкаванні 100-годдзя БНР

Беларускую Праваслаўную Царкву афіцыйна запрасілі выступіць на святкаванні 100-годдзя абвяшчэння дзяржаўнай незалежнасці БНР. З дазволу ўладаў яно пройдзе 25 сакавіка каля Опернага тэатру, дзе адбудуцца мітынг і канцэрт (ад 13-й да 19-й гадзіны).
Арганізатары мерапрыемства лічаць, што ўдзел БПЦ важны, «бо гісторыя БНР неразрыўна звязаная з гісторыяй праваслаўнай царквы». Яны нагадваюць, што ў Радзе БНР быў праваслаўны святар Сцяпан Кульчыцкі. У 1922 годзе Беларуская Народная Рэспубліка атрымала дабраслаўленне патрыярха маскоўскага Ціхана. У 1993-м кіраўнік БПЦ мітрапаліт Філарэт удзельнічаў у святкаванні 75-годдзя БНР, дабраславіў выкарыстанне беларускай мовы ў службах.

«Гісторыя Беларускай Праваслаўнай Царквы мае непасрэднае дачыненне да гісторыі БНР. Таму мы запрашаем Вас або Вашага прадстаўніка ўзяць удзел у святкаванні 100-годдзя Беларускай Народнай Рэспублікі — выступіць з віншавальнай прамовай на сцэне каля Опернага тэатру», — з такой прапановай арганізатары звярнуліся да цяперашняга кіраўніка БПЦ мітрапаліта Паўла.

Напярэдадні мітрапаліт Павел заявіў, што Беларуская Праваслаўная Царква не будзе праводзіць мерапрыемстваў, прысвечаных 100-годдзю БНР. Ён лічыць, што «спробы палітызацыі малітвы» недапушчальныя. «У нас штодня моляцца за Беларусь», — сказаў кіраўнік БПЦ. А вось мітрапаліт Мінска-Магілёўскі арцыбіскуп Тадэвуш Кандрусевіч, кіраўнік Рыма-Каталіцкага Касцёлу ў Беларусі, 25 сакавіка на Дзень Волі ўзначаліць імшу ў кафедральным саборы ў беларускай сталіцы.

Паводле Еўрарадыё

Хочаце ведаць больш? Сачыце за нашымі публікацыямі ў Telegram і Facebook!