Бярозаўскія актывісты аднавілі помнік паўстанцам 1863 году

Актывісты з Бярозаўкі аднавілі помнік паўстанцам 1863 года паміж вёскамі Малое Ольжава і Мохавічы.
Фота Сяргея Пантуса

Фота Сяргея Пантуса

«Драўляныя дубовыя крыжы былі пастаўленыя на гэтым месцы яшчэ ў 1995 Станіславам Суднікам і яго паплечнікамі. Гэта насамрэч магіла палеглых паўстанцаў. Але за 22 гады дрэва састарэла і было відавочна, што патрэбна рэканструкцыя», — распавёў сайту актывіст Руху «За Свабоду» Вітольд Ашурак.

Па ягоных словах, «на сходзе Лідскай раённай суполкі (Рух «За Свабоду», Партыя БНФ, ТБМ) было вырашана не толькі рэстаўраваць крыжы, але і стварыць сапраўдны мемарыял у гонар герояў, якія не пашкадавалі свайго жыцця ў змаганні за незалежнасць нашага краю».

«Некалькі разоў ладзілі талаку. Аднойчы да нас далучыліся валанцёры Дома Польскага ў Лідзе. Салідарнасць людзей сапраўды ўражвала — да каго ні звярталіся, кожны за гонар лічыў дапамагчы! Знайшлі цудоўнага беларускага майстра-рэзчыка па каменю. Максім Рунец жыве ў Бярозаўцы і з задавальненнем выканаў складаную працу з надпісам і гербам паўстання», — дадаў Ашурак.

Фота Сяргея Пантуса

Фота Сяргея Пантуса

На сёння асноўная праца над камянём-помнікам скончаная. Засталося дапрацаваць дэталі, адпаліраваць і ўмацаваць мур пад курганом з камянёў, што будзе зроблена ў найбліжэйшы час.

Аднаўляць падобныя помнікі вельмі важна для Беларусі, лічыць Ашурак. «Па-першае — гэта сімвал нашага народу. Гэта не дзесьці там (далёка і няпраўда), а тут, побач, на нашай зямлі, нашыя продкі здзейснілі подзвіг — яны паднялі сцяг свабоды супраць каланізатараў. Гэта важна асабліва сёння, калі старыя, ілжывыя сімвалы саўдэпаўскай імперыі канчаткова сябе дыскрэдытавалі, і ідэалагічны вакуум павінен быць запоўнены сапраўднымі нашымі беларускімі героямі», — заключыў сябра Руху «За Свабоду».


Паводле pyx.by

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!