Брэсцкі гарвыканкам забараніў правядзенне двух мітынгаў супраць акумулятарнага завода

Брэсцкі гарвыканкам забараніў правядзенне двух мітынгаў супраць акумулятарнага завода, паведамляе БелаПАН.
Ініцыятары мітынгаў планавалі інфармаваць грамадзян пра шкоду вытворчасці для здароўя людзей і навакольнага асяроддзя, а таксама аб ходзе грамадскай кампаніі супраць гэтага завода.

Як паведаміў адзін з заяўнікаў мітынгаў праваабаронца Раман Кісляк, абедзве акцыі намячаліся на 16 снежня ў парку Воінаў-Інтэрнацыяналістаў.

Па словах праваабаронцы, мітынг на пляцоўцы каля сцэны, вызначанай мясцовай уладай для правядзення масавых мерапрыемстваў, забаронены ў сувязі з правядзеннем тут у гэты дзень запланаванага раней конкурсу эстрадных мініяцюр «Навагодні калейдаскоп».

Мітынг, які яны заяўлялі на пляцоўцы побач з усталяваным на пастаменце бронетранспарцёрам, мясцовая ўлада забараніла, спаслаўшыся на тое, што гэтая пляцоўка размешчана каля праезнай часткі з інтэнсіўным рухам транспарту, і гэта абцяжарвае паўнавартаснае забеспячэнне бяспекі ўдзельнікаў мерапрыемства.

Акумулятарны завод будуе на прамысловай пляцоўцы «Аэрапорт» у свабоднай эканамічнай зоне «Брэст» ТАА «АйПауэр». Жыхары Брэста і некалькіх вёсак Брэсцкага раёна лічаць, што прадпрыемства пагражае іх здароўю. З 25 лютага кожную нядзелю на плошчу Леніна ў Брэсце прыходзяць праціўнікі будаўніцтва акумулятарнага завода, якія абменьваюцца апошнімі навінамі аб будаўніцтве прадпрыемства.

Са студзеня гэтага года актывісты падавалі заяўкі на правядзенне ў Брэсце і Брэсцкім раёне 32 мітынгаў, 12 пікетаў і чатырох дэманстрацый. Улады санкцыянавалі толькі адну акцыю: 29 красавіка на ўскраіне Брэста, у парку Воінаў-Інтэрнацыяналістаў, прайшоў санкцыянаваны ўладамі мітынг «Брэстчанкі супраць свінцу», на які сабралася каля дзвюх тысяч чалавек. З тых часоў неаднаразовыя спробы праціўнікаў будаўніцтва завода атрымаць дазвол на правядзенне мітынгу поспехам не ўвянчаліся — гарадскія ўлады не давалі дабро, матывуючы гэта тым, што ў заяўленыя даты запланаваныя іншыя мерапрыемствы.

Зараз жыхары некалькіх вёсак Брэсцкага раёна збіраюць ініцыятыўную групу для правядзення мясцовага рэферэндуму па пытанні будаўніцтва пад Брэстам акумулятарнага завода.

TUT.BY

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: