Брэст. Правесці рэферэндум наконт пабудовы завода

Жыхары Брэстчыны праз правядзенне рэферэндуму маюць намер стварыць прававую падставу для забароны шкоднага прадпрыемства.

Фота: Павел Кляўчэня, Першы Рэгіён

Жыхары Брэсцкага раёна маюць намер ініцыяваць мясцовы рэферэндум аб забароне будаўніцтва акумулятарнага завода пад Брэстам, піша www.racyja.com са спасылкай на БелаПАН.

Як паведаміў БелаПАН праваабаронца Раман Кісляк, цяпер ідзе фарміраванне ініцыятыўнай групы з ліку жыхароў раёна, якія валодаюць выбарчым правам. У адпаведнасці з Выбарчым кодэксам у такую групу павінна ўвайсці не менш за 20 грамадзян.

На рэферэндум мяркуецца вынесці пытанне аб забароне любой дзейнасці, звязанай з будаўніцтвам і эксплуатацыяй завода па вытворчасці свінцова-кіслотных акумулятарных батарэй на тэрыторыі Брэсцкага раёна.

Кісляк адзначыў, што пасля фарміравання ініцыятыўная група правядзе агульны сход, а затым накіруе ў Брэсцкі райвыканкам заяву аб рэгістрацыі ініцыятыўнай групы і пытання, якое прапаноўваецца на рэферэндум.

Пасля рэгістрацыі ініцыятыўнай групы ў яе будзе два месяцы для збору подпісаў. Для ініцыявання рэферэндуму неабходна сабраць подпісы не менш як 10% грамадзян, якія валодаюць выбарчым правам і пражываюць на тэрыторыі раёна.

“Жыхары рэгіёну правядзеннем рэферэндуму маюць намер стварыць прававую падставу для забароны гэтага шкоднага для іх прадпрыемства, — заявіў Кісляк. — Грамадзяне маюць права на непасрэдны ўдзел у вядзенні дзяржаўных спраў, у тым ліку шляхам прыняцця рашэнняў на рэферэндуме па найважнейшых пытаннях дзяржаўнага і грамадскага жыцця”.

Як удакладніў праваабаронца, да гэтага часу ў Беларусі мясцовыя рэферэндумы не праводзіліся. Будаўніцтва акумулятарнага завода ТАА “АйПаўэр” вядзецца на прамысловай пляцоўцы „Аэрапорт” у свабоднай эканамічнай зоне „Берасце”.

На заводзе будзе наладжаны поўны цыкл вытворчасці свінцова-кіслотных акумулятарных батарэй.

Жыхары Брэста і Брэсцкага раёна лічаць, што прадпрыемства пагражае іх здароўю. Актывісты выявілі шэраг парушэнняў пры рэалізацыі праекта і дамагаюцца прыпынення будаўніцтва.

Грамадская кампанія супраць узвядзення завода пачалася ў рэгіёне ў студзені. Паводле дадзеных Кісляка, за гэты час актывісты падалі заяўкі на правядзенне ў Брэсце і Брэсцкім раёне 29 мітынгаў, 12 пікетаў і трох дэманстрацый. Улады санкцыянавалі толькі адну акцыю: 29 красавіка мітынг „Берасцейкі супраць свінцу” на ўскраіне горада, на які сабралася каля дзвюх тысяч чалавек.

31 кастрычніка прэм’ер-міністр Сяргей Румас заявіў, што асцярогі наконт будаўніцтва акумулятарнага завода ў Брэсце крыху перабольшаныя. “Праект прайшоў усе неабходныя экалагічныя экспертызы, і ў заказчыкаў гэтага прадпрыемства ёсць усе неабходныя дазволы на вытворчасць работ”, — сказаў ён. Несумненна, лічыць Румас, такія буйныя праекты павінны ўзгадняцца з жыхарамі. “Але важна разумець, што гэта ж і вырашэнне праблемы занятасці для рэгіёнаў. На гэтых прадпрыемствах нашы грамадзяне змогуць атрымаць працоўныя месцы. Улічваючы, што гэта высокатэхналагічныя праекты, яны змогуць атрымліваць дастойную заработную плату”, — заявіў ён.

З 25 лютага кожную нядзелю на плошчы Леніна ў Брэсце збіраюцца праціўнікі будаўніцтва завода.

www.racyja.com


Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: