Былога начальніка ўпраўлення Мінабароны прысудзілі да дзевяці гадоў пазбаўлення волі

Суд Фрунзенскага раёна Мінска 3 красавіка прысудзіў былога начальніка ваенна-медыцынскага ўпраўлення Мінабароны 44-гадовага палкоўніка Аляксея Яськова да дзевяці гадоў пазбаўлення волі ў калоніі ўзмоцненага рэжыму з канфіскацыяй маёмасці, а таксама пазбаўлення воінскага звання і штрафу ў памеры 500 базавых велічынь (12,7 тыс. рублёў).
Аляксей Яськоў. Фота: tut.by

Аляксей Яськоў. Фота: tut.by

Справа Яськова слухалася ў судзе Фрунзенскага раёна з 6 сакавіка. Яськова прызналі вінаватым у атрыманні хабару ў асабліва буйным памеры і ў злоўжыванні ўладай. Пракурор Юрый Шарснёў запытваў пакаранне ў выглядзе пазбаўлення волі на дзевяць гадоў.

Паводле абвінавачання, Яськоў у некалькі этапаў атрымаў ад намесніка дырэктара фірмы «Геол-М» Аляксандра Семенюка не менш за 18 тысяч долараў за спрыянне прасоўванню прадукцыі арганізацыі.

«Геол-М» ужо некалькі разоў фігуравала ў працэсах па справах аб карупцыі ў Міністэрстве аховы здароўя. Заснавальнік і дырэктар «Геол-М» Уладзімір Ладуцька як хабарадавальнік даваў паказанні ў працэсах супраць былога начальніка галоўнага ўпраўлення аховы здароўя Гродзенскага аблвыканкама Андрэя Стрыжака, былога галоўнага ўрача 12-й стаматалагічнай паліклінікі Мінска Уладзіміра Краўчонка, былога кіраўніка Рэспубліканскага цэнтра медыцынскай рэабілітацыі і бальнеалячэння Сяргея Карыцька.

Былы начальнік ваенна-медыцынскага ўпраўлення Мінабароны віну не прызнаў. Яськоў займаў пасаду начальніка ваенна-медыцынскага ўпраўлення Мінабароны з красавіка 2015 года да моманту яго затрымання. Адказваў за забеспячэнне медыцынскім абсталяваннем падведамасных міністэрству ўстаноў аховы здароўя, разглядаў камерцыйныя прапановы, рыхтаваў прапановы па размеркаванні фінансавых сродкаў.

naviny.by

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Грамадства: галоўнае

Больш цікавага на «Новым Часе»: