Цяпер без подпісу Пракаповіча. У дызайн беларускіх банкнот унясуць змены

Праўленне Нацбанка прыняло рашэнне аб правядзенні мадыфікацыі банкнот, якія знаходзяцца ў звароце, пры захаванні асноўных малюнкаў на пярэднім і адваротным баках, а таксама іх каляровай гамы і памеру, паведаміла прэс-служба рэгулятара.
Заказ асобных наміналаў мадыфікаваных банкнот і ўвод іх у зварот будзе ажыццёўлены ў 2019-2020 гг.

У мадыфікаваныя банкноты будуць унесены наступныя змены:

- выявы архітэктурных збудаванняў на асноўных баках мадыфікаваных банкнот будуць прыведзены ў адпаведнасць з актуальным знешнім выглядам з указаннем назвы намаляваных архітэктурных збудаванняў;

- на мадыфікаваных банкнотах будуць выключаныя рэквізіты «Старшыня Праўлення» і факсімільныя подпісы старшыні праўлення Нацбанка Пятра Пракаповіча, які пайшоў у адстаўку яшчэ ў 2011 годзе;

- у адпаведнасці з новай рэдакцыяй Правіл беларускай арфаграфіі і пунктуацыі на банкноце наміналам 50 рублёў надпіс «пяцьдзЕсят» будзе выпраўленая на «пяцьдзЯсят».

Акрамя таго, на банкнотах будзе паказаны год планаванага выпуску ў абарачэнне: замест «2009» для банкнот наміналамі 5 і 10 рублёў — «2019», для банкнот наміналамі 20 і 50 рублёў — «2020».

У сувязі з тым, што на банкнотах будзе паказвацца год іх фактычнага выпуску, спатрэбілася ўнясенне змяненняў ва ўказ прэзідэнта № 450 "Аб правядзенні дэнамінацыі афіцыйнай грашовай адзінкі Рэспублікі Беларусь».

У рамках мадыфікацыі банкнот Нацбанк правёў працу па аптымізацыі іх абарончага комплексу. «Пры гэтым былі максімальна выкарыстаныя ўсе наяўныя сёння сродкі для таго, каб грамадзяне маглі дастаткова проста, без выкарыстання спецыяльнага абсталявання, адрозніць сапраўдныя банкноты ад несапраўдных і тым самым засцерагчы сябе ад іх выпадковага прыёму», — адзначана ў паведамленні.

У цяперашні час Нацбанк прыступіў да правядзення падрыхтоўчых мерапрыемстваў па выбары прадпрыемства-вытворцы і выпуску ў абарачэнне мадыфікаваных банкнот. Перад выпускам у абарачэнне банкнот новых гадоў выпуску Нацбанк прадаставіць падрабязную інфармацыю аб іх вонкавым выглядзе і прыкметах сапраўднасці.

Раней уведзеныя ў абарачэнне банкноты ўзору 2009 года будуць заставацца законным плацежным сродкам.

Рэгулятар адзначае, што дадатковы выраб наяўных грошай не азначае павелічэнне грашовай масы, паколькі іх выпуск у зварот прыводзіць да пераходу грашовых сродкаў з безнаяўнай формы ў наяўную, так як банкі за атрыманыя грашовыя знакі пералічваюць Нацыянальнаму банку іх безнаяўны эквівалент.


Паводле tut.by

Хочаце ведаць больш? Сачыце за нашымі публікацыямі ў Telegram і Facebook!