
Cупрацоўніка «Гроднажылбуд» звольнілі другі раз з-за забастоўкі
- Грамадства
- 22-02-2021
Cупрацоўніка «Гроднажылбуд» Антона Сафонава звольнілі 15 лютага пасля працяглых бальнічных: яго кіраўніцтва вырашыла, што ён прагульваў. У тыя дні ён якраз рыхтаваўся аспрэчваць папярэднія вымовы ў судзе. Але суд хлопцу не дапамог, піша hrodna.life.

У жніўні 2020 года «Гроднажылбуд» стаў адным з цэнтраў пратэсту супраць вынікаў выбараў прэзідэнта і гвалту сілавікоў на вуліцах Гродна: рабочыя сустрэліся з кіраўніцтвам горада, пракурорам, але да згоды з уладамі так і не прыйшлі. Пасля гэтага тых, хто актыўна выказваўся на прадпрыемстве, паступова альбо звольнілі, альбо стварылі такія ўмовы, што дзясяткі рабочых сышлі самі.
7 лістапада Антон выйшаў на працу, а з 11 чысла сышоў на бальнічны ліст: сарваў спіну на працы, давялося апераваць міжпазваночную кілу. Пасля бальнічнага Антон выйшаў на працу 6 студзеня і прапрацаваў да 29 студзеня. Пазней ён зноў пайшоў на бальнічны на тыдзень, а потым адразу — на бальнічны па доглядзе дзіцяці.
На працу Антон выйшаў 15 лютага. У той жа дзень начальства паказала яму загад аб яго звальненні па арт. 47 Працоўнага кодэкса — «Дадатковыя падставы спынення працоўнага дагавора з некаторымі катэгорыямі работнікаў пры пэўных умовах». Прычына — адсутнасць на працоўным месцы 25, 26 і 28 верасня 2020 года. Хоць у лістападзе ён пісаў тлумачальную, што рыхтаваўся да суда з 25 верасня да 6 лістапада.
Антон пасля аперацыі на міжпазваночнай кіле аднаўляецца і двойчы на тыдзень ходзіць на рэабілітацыю ў фітнес-цэнтр «Korra» (студыя, у якой ёсць асобны кірунак — лячэбная фізкультура, накіраваная на паляпшэнне каардынацыі, паставы, стану цягліц, суставаў). Раз на тыдзень ходзіць у звычайную спартзалу, каб умацаваць мышцы спіны.
Пасля такой аперацыі складана знайсці новую працу. «Не тое што па спецыяльнасці, а ў прынцыпе працу будзе знайсці досыць складана. Мне нагружаць спіну нельга, трэба старацца падымаць цяжару як мага менш. Мне і сядзець доўга нельга — сядзячая праца таксама не моцна падыдзе. Яшчэ паўгода мне пажадана больш стаяць або ляжаць. Сапраўды, з гэтым праблемы будуць. Але будзем выходзіць з гэтай сітуацыі».
Антон быў маральна гатовы да звальнення. «Настрой баявы. Я ні кропелькі не засмучаны з-за таго, што мне даслалі новы загад. Я вельмі доўга смяяўся пры сваіх кіраўніках і пытаўся, чаму ж яны так доўга яны чакалі. Яны далі мне прапрацаваць яшчэ цэлы месяц», — распавёў ён Hrodna.life.
Загад Сафонаву на рукі яшчэ не далі. Антон з адвакатам запыталі дакументы і рыхтуюцца да новых судовых разглядаў.
— Яшчэ пазмагаемся за справядлівасць, за праўду і за тое, каб людзей, якія сапраўды працуюць і хочуць працаваць, да якіх не было за 16 гадоў аніводнай прэтэнзіі на працы, не звальнялі і паважалі, — сказаў гарадзенец Hrodna.life.
Сябру Антона, яшчэ аднаму супрацоўніку «Гроднажылбуд» у падобнай сітуацыі адмовілі ў пазове аб аднаўленні на працу.
Раней у «Гроднажылбуд» казалі, што завадатараў страйку «заела сумленне», таму яны звольніліся самі, ніякага ціску на іх і масавых звальненняў пасля жнівеньскіх падзей на прадпрыемстве не было.
Хочаце ведаць больш? Сачыце за нашымі публікацыямі ў Telegram і Facebook!