Як справы ў швейцаркі Наталлі Хершэ, што сарвала з амапаўца балаклаву

Ураджэнка Беларусі, цяпер – грамадзянка Швейцарыі, Наталля Хершэ, асуджаная на два з паловай гады за тое, што сарвала балаклаву з амапаўца, ад 19 да 25 студзеня трымала галадоўку. На гэты крок жанчына наважылася, бо з пачатку года да яе перастала даходзіць карэспандэнцыя. Пра галадоўку Наталлі, умовы ўтрымання і хуткі разгляд апеляцыі «Белсат» паразмаўляў з братам швейцаркі Генадзем Касьянам.
Наталля Хершэ ў судзе Савецкага раёну Менску. Фота: АД / Белсат

Наталля Хершэ ў судзе Савецкага раёну Менску. Фота: АД / Белсат

Галадоўка як пратэст супраць парушэння правоў

Мужчына распавёў, што рашэнне сястры адмовіцца ад ежы стала для яго нечаканасцю і спачатку вельмі засмуціла.

У чацвер 21 студзеня спадар Касьян павёз для Наталлі ў СІЗА традыцыйную перадачу, у якой было «шмат розных прадуктаў, а таксама дзесяць кілаграмаў фруктаў».

– Я спачатку доўга чакаў, пакуль прымуць перадачу, мне сказалі, што прыйдзе афіцэр, што ўжо мяне ўсхвалявала: думаў, што ж здарылася? – распавядае Генадзь. – Прыйшоў нейкі маёр і паказаў мне заяву ад Наталлі ад 19 студзеня, што яна адмаўляецца ад перадач і пасылак з прадуктамі. Я бачыў, што заява сапраўды напісана ейнай рукой, стаяў ейны подпіс.

Паводле Генадзя, маёр яму нічога не патлумачыў, а на пытанне, што з Наталляй, сказаў, што ўсё добра. Брат швейцаркі вельмі ўсхваляваўся, патэлефанаваў адвакатцы. Яна адразу прыехала да Наталлі, і праз яе Генадзь даведаўся, што сястра з 19 студзеня абвесціла галадоўку на знак нязгоды з тым, што да яе не даходзіць карэспандэнцыя. Адначасова, зазначае Генадзь, і ад Наталлі ніхто не атрымліваў лістоў. Жанчына напісала афіцыйную заяву, у якой патлумачыла, што яе галадоўка – пратэст супраць парушэння ейнага права на ліставанне.

Паводле спадара Касьяна, заява Наталлі падзейнічала адразу – ужо 19 студзеня ёй прынеслі 14 лістоў, 20 студзеня – яшчэ 12, і 21-га – два разы па шэсць лістоў прыносілі. Таксама сяброўка Наталлі ўжо атрымала два лісты ад яе.
Генадзь, брат Наталлі Хершэ. Суд Савецкага раёну разглядае крымінальную справу Наталлі Хершэ па арт.363.2. Менск, Беларусь. 3 снежня 2020 году. Фота: Белсат

Генадзь, брат Наталлі Хершэ. Суд Савецкага раёну разглядае крымінальную справу Наталлі Хершэ па арт.363.2. Менск, Беларусь. 3 снежня 2020 году. Фота: Белсат

Галадоўка можа быць адзіным крокам, каб выказаць пратэст за кратамі

Акрамя таго, жанчыну перавялі ў іншую камеру, з лепшымі ўмовамі. Хоць адначасова там шматлюдна – цяпер восем жанчын, а ўвогуле камера разлічана на дзесяць асобаў. Наталля распавядае, што ў яе вельмі добрыя сукамерніцы – швейцарка апынулася ў кампаніі з заснавальніцай «Прэс-клубу» Юліяй Слуцкай.

Наталля Хершэ спыніла галадоўку ў панядзелак 25 студзеня. Генадзь ужо падрыхтаваў для сястры перадачу, якую панясе ў сераду, 27 студзеня.

Спадар Касьян лічыць, што галадоўка сястры была ва ўмовах зняволення, мо, і адзіным магчымым крокам, каб паказаць сваю нязгоду, пратэст супраць парушэнняў правоў.

– Спачатку я вельмі хваляваўся за сястру, спужаўся за яе. Але потым пагадзіўся, што гэта быў слушны крок, – кажа Генадзь. – Адначасова мяне вельмі цешыць, што яна скончыла галадоўку. Паказаць сваю пазіцыю важна, але адначасова ўсё гэта не варта таго, каб знішчаць свой арганізм. Як медык, я разумею, да якіх наступстваў можа прывесці галадоўка.

Спадар Касьян таксама ўсцешаны, што галадоўку спыніў Ігар Лосік.

– Я вельмі разумею Ігара, але адначасова вельмі рады, што ён усё ж скончыў галадоўку. Не трэба нішчыць сваё здароўе, – кажа Генадзь. – Хоць гэта прыклад волі і стойкасці чалавека, які згадзіўся аддаць сваё жыццё ў барацьбе з беззаконнем, гэта гераічны ўчынак.

Наталля Хершэ. Суд Савецкага раёну разглядае крымінальную справу па арт.363.2 у дачыненні жанчыны, Менск, Беларусь. 3 снежня 2020 году. Фота: Белсат

Наталля Хершэ. Суд Савецкага раёну разглядае крымінальную справу па арт.363.2 у дачыненні жанчыны, Менск, Беларусь. 3 снежня 2020 году. Фота: Белсат

Кодэкс не прадугледжвае шматразовыя сустрэчы для асобаў пад вартай

Генадзь распавядае, што Наталля не скардзіцца на ўмовы ўтрымання. Сяброўкі выпісалі ёй часопіс «Наша гісторыя», газету «Новы Час» – так Наталля спраўляецца з інфармацыйным вакуумам. У той жа час Генадзь не можа перадаць кнігі для сястры – не прымаюць. Мужчына накіроўваў пытанне на гэты конт у адрас кіраўніцтва СІЗА-1, і атрымаў адказ, што асобы, якія знаходзяцца пад вартай, маюць права карыстацца літаратурай толькі з мясцовай бібліятэкі, а таксама набытай адміністрацыяй СІЗА ў гандлёвай сетцы.

Не даюць дазвол Генадзю і на спатканне з сястрой. Мужчына на пачатку студзеня падаваў у суд Савецкага раёна г.Менску заяву на сустрэчу, але яму адмовілі, спаслаўшыся на тое, што адно спатканне ў снежні ўжо было, а УПК Беларусі не прадугледжвае шматразовыя сустрэчы з асобамі пад вартай.

Адначасова Генадзя радуе, што ў адвакаткі няма перашкодаў для камунікацыі з Наталляй.

Жанчыну рэгулярна – прыкладна кожныя два тыдні – наведвае пасол Швейцарыі, яму выдзяляюць гадзіну для сустрэчы з Наталляй.

16 лютага а 10-й гадзіне ў Мінскім гарадскім судзе адбудзецца разгляд апеляцыйнай скаргі Наталлі Хершэ на прысуд.

Наталля Хершэ (са сцягам) з братам і ягонымі дзецьмі. Фота з сямейнага архіву

Наталля Хершэ (са сцягам) з братам і ягонымі дзецьмі. Фота з сямейнага архіву

Таксама да 16 лютага Супольнасць беларусаў у Швайцарыі рыхтуе супольную заяву на імя старшыні Мінскага гарадскога суду. Швейцарска-нямецкая праваабарончая арганізацыя «Libereco – партнёрства за правы чалавека» таксама рыхтуе заяву аб тым, што прысуд Наталлі парушае два артыкулы Міжнароднага пакта аб грамадзянскіх і палітычных правах: арт. 9 – адвольнае затрыманне, арт. 21 – права на мірныя сходы.

Наталля Хершэ – беларуска са швейцарскім грамадзянствам, была затрыманая ў Менску 19 верасня падчас «Бліскучага маршу» жанчын. Калі жанчыну цягнулі ў аўтазак, яна паспрабавала зняць з сілавіка балаклаву. З-за гэтага на Наталлю завялі крымінальную справу па арт. 363 КК РБ – супраціў супрацоўніку ўнутраных спраў з ужываннем гвалту. 7 снежня суд Савецкага раёну г.Мінска пакараў швейцарку 2,5 гадамі зняволення ў калоніі. Цяпер Наталля Хершэ знаходзіцца ў СІЗА-1 на Валадарцы ў Мінску.

Ганна Ганчар, belsat.eu

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: