Дэкрэт пра дармаедаў не скасуюць. Ён будзе абноўлены да 1 кастрычніка

Аляксандар Лукашэнка запатрабаваў абнавіць дэкрэт № 3 да 1 кастрычніка — рыхтаванне новай рэдакцыі «дэкрэту пра дармаедаў», кажа ён, ужо завершанае.

9 сакавіка Лукашэнка пастанавіў прыпыніць на год дзеянне дэкрэту пасля масавых акцыяў пратэсту па ўсёй Беларусі, але пасля шматкроць нагадваў, што не адмовіўся ад «падатку на дармаедаў».

Што менавіта зменяць у дэкрэце, Лукашэнка не ўдакладніў, спаслаўшыся на тое, што «неаднаразова пра гэта выказваўся».

«Мясцовыя органы ўлады, якія непасрэдна кантралююць рынак працы і бачаць кожнага чалавека, і выканаўчыя органы ўлады на месцах павінны мець усе паўнамоцтвы і вагары ўздзеяння на гэтых людзей для развязання праблемы. Вось што мы павінны зрабіць і прапісаць у новай рэдакцыі дэкрэту, — заявіў Лукашэнка. — Я спадзяюся, што акрамя ўраду пытаннем сур'ёзна зоймуцца дэпутаты. Гэта іхны хлеб. Ухіляцца ад гэтай праблемы дэпутату нельга».

Паводле Лукашэнкі, у Беларусі «як мінімум паўмільёна» людзей, якія не працуюць. Паводле ж Белстату, у Беларусі толькі 260 тысяч беспрацоўных — але амаль паўмільёна лістоў разаслалі «патэнцыйным дармаедам». З тых 470 тысяч толькі 11% сплацілі збор (ім цяпер абяцаюць вярнуць грошы за 2015 год). Беларусь тымчасам страціла з 2010 году 300 тысяч чалавек працаздольнага насельніцтва.

Лукашэнка кажа, што з тых «паўмільёна» можна вызваліць ад збору каля 200 тысяч чалавек — шматдзетныя сем’і, хворых, інвалідаў і «людзей, якія, можа, і хочуць працаваць, але ў іх не атрымліваецца ў сілу жыццёвых абставінаў».

«Але 300 тысяч дзе? — абураўся Лукашэнка. — Таму Дэкрэт № 3 — гэта 300 тысяч. Тых, хто павінен працаваць, але не працуе. І мы іх павінны прымусіць працаваць. Вось і ўся ідэалёгія».

Міжнародныя арганізацыі тымчасам абвінавачваюць Беларусь ува ўжыванні прымусовай працы насуперак падпісаным Беларуссю дамовам. Рэч ня толькі ў «дармаедах», але і ў прымусовай працы зняволеных і вайскоўцаў, прымусовых суботніках, удзеле школьнікаў і студэнтаў ува ўборачнай кампаніі, неэфэктыўнай барацьбе з гандлем людзьмі.

svaboda.org

Хочаце ведаць больш? Сачыце за нашымі публікацыямі ў Telegram і Facebook!

Абмеркаванне:

  • Юрась Беларус
  • 2017-08-03 16:11:31
"... І мы іх павінны прымусіць працаваць..."
---------------------------------------------------------------------------------------------------------------------------------------------
" ... Прымусовая праца забараняецца, акрамя работы або службы, якая вызначаецца прыгаворам суда або ў адпаведнасці с законам аб надзвычайным і ваенным становішчы" (артыкул 41 Канстытуцыі Рэспублікі Беларусь). Прычым, што вельмі цікава, гэтая частка артыкула 41 Канстытуцыі Рэспублікі Беларусь прынамсі з сайта http://knihi.com/none/Kanstytucyja_Respubliki_Bielarus_1994_h.html#chapter2 не капіруецца.

Больш цікавага на «Новым Часе»: