«Добра прайсціся па гэтых сайтах, каналах». Лукашэнка загадаў КДБ разабрацца з інфарэсурсамі

Сёння Лукашэнка сабраў у Палацы Незалежнасці чарговую нараду, на якой прысутнічаў старшыня КДБ Валерый Вакульчык. Кіраўнік краіны даручыў яму разабрацца з сайтамі і телеграм-каналамі, якія ствараюць паніку з-за каронавіруса, паведамляе «Пул першага».
— Валерый Паўлавіч, ужо хопіць на гэта глядзець. Трэба добра прайсціся па гэтых сайтах, каналах. Загінула жанчына ў Віцебску — ніякага там каронавіруса, і пасля гібелі ўзялі аналізы некалькі разоў. Мне дакладваюць па кожным выпадку падобных смерцяў ... Не, ўзялі, раскаталі, што загінула нібыта ад каронавіруса. Для чаго? Каб стварыць паніку, — сказаў Лукашэнка.

Кіраўнік дзяржавы падкрэсліў, што з тымі, хто займаецца падобнымі ўкідамі, неабходна разабрацца. «Навошта яны людзей атручваюць?» — спытаў ён.

Учора ў СМІ з'явіліся публікацыі пра смерць жанчыны ў Віцебску. Паводле афіцыйнай версіі, яна памерла ад цяжкай пнеўманіі і пакутавала шэрагам хранічных захворванняў. Але родныя памерлай распавялі журналістам, што ў жанчыне бралі тэст на каронавірус і, па іх словах, ён апынуўся станоўчым. Таксама яны сказалі, што тэст ўзялі ў родных, але вынік пакуль не агучылі. Міністэрства аховы здароўя абвергла інфармацыю аб тым, што памерлая жанчына была інфікаваная каронавірусам.

the-village.me

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: