Фігуранта «справы медыкаў» паўгода здымалі на схаваную камеру

Сёння ў Мінскім гарадскім судзе, у якім адбываецца масавы працэс па «справе медыкаў», паказваюць аператыўна-вышуковай матэрыялы. Як аказалася, у кабінеце дырэктара Цэнтра экспертыз і выпрабаванняў у ахове здароўя Аляксандра Сталярова схаваная камера і аўдыёзапіс былі ўсталяваныя з лістапада 2017 года, кайданкі на яго надзелі ў траўні 2018-га.
Аляксандр Сталяроў

Аляксандр Сталяроў

На сённяшні дзень дапытаныя ўжо ўсе 20 фігурантаў гучнай справы. Бок абвінавачвання перайшоў да вывучэння аператыўна-вышуковых мерапрыемстваў. Перш чым паказаць відэа на вялікім экране, пракурор Аляксандр Андрэеў чытае яго апісанне:

 6.12.2017 года ў 10.09 у кабінет да Сталярова заходзіць Кузняцоў (прадстаўнік кампаніі «Лекфарм», таксама абвінавачаны па гэтай справе. — Заўвага. TUT.BY), дастае канверт і кладзе на стол. У 10.14 Кузняцоў сыходзіць, Сталяроў бярэ канверт, змяшчае ў стол, чутны шолах паперы, як пры пералічванні грошай, канверт выкідвае ў сметнік, грошы кладзе перш у барсетку, потым яе ставіць у шафу. Далей аб'ект працуе з дакументамі.

Яшчэ падчас допыту Аляксандр Сталяроў распавядаў, што «шыфраваўся» пры перадачы хабараў, грошы пералічваў заўсёды альбо ў стале, або ў барсетцы.

— Пазнаеце сябе? — звяртаецца да абвінавачанага пракурор Андрэеў.

— Пазнаю, — адказвае Сталяроў. — Не ўпэўнены, што на першай палове файла Кузняцоў.

— Грашовыя сродкі перадаваліся? — удакладняе дзяржабвінаваўца.

— Не, на відэа не бачна, што ён перадае. Гэта маглі быць дакументы, спіс з лекамі, — мяркуе дырэктар Цэнтра экспертыз і выпрабаванняў у ахове здароўя.

Схаваная камера ў кабінеце Сталярова ўстаноўлена ў некалькіх метрах ад яго стала, на чорна-белым экране відаць, як ён прымае наведвальнікаў, бярэ нешта са стала, чутны шолах, але не ўсе словы чутныя выразна.

Аляксандр Сталяроў віну прызнае часткова. На думку следства, ён атрымаў хабару на суму 52 650 долараў, сам фігурант прызнае толькі 16 тысяч долараў. Грошы ён атрымліваў за рэгістрацыю лекаў, яму прадстаўнікі бізнесу перадавалі адмысловы спіс, дзе было пазначана, якія прэпараты павінны быць зарэгістраваныя ў Цэнтры экспертыз.

Калі пракурор папрасіў пракаментаваць відэа хабарадавальніка, прадстаўніка кампаніі «Лекфарм» Дзмітрыя Кузняцова, то ён заявіў: Сталярову перадаваў не спіс, а грошы.

Ужо пры наступнай сустрэчы, 29 снежня 2017 года, у кабінеце Сталярова гучыць фраза, незразумелая старонняму чалавеку: «Вось там шэсць і шэсць. Адзін і восем фіксаваліся».

— Проста балбатня, — тлумачыць суду Сталяроў.

 Гэта 6600 долараў, а адзін і восем — грошы, 1800 долараў. Раней жа было сказана, што гэта фіксаваная аплата Сталярова, — тлумачыць абвінавачваны Кузняцоў.

Падчас допыту Аляксандр Сталяроў сцвярджаў: ніякія сумы хабараў з Кузняцовым не абмяркоўваліся, наогул нават гаворка не ішла пра гэта. Мяркуючы па відэа, якія паказваюць у судзе, гэта зусім не так.

— Што ў вас добрага? — пытаецца ён падчас чарговага прыходу Кузняцова.

— Нічога добрага. Снегапады, — наракае апошні, але не само надвор'е яго хвалюе, а тое, што ў Маскве з-за снегападаў адмяняюць рэйсы, а хабары для Аляксандра Сталярова перадаваліся менавіта з Масквы. Тым не менш, Кузняцоў нешта працягнуў дырэктару цэнтра.

— Дык дзе гэта? — пытаецца Сталяроў.

— У яе (яшчэ адзін хабарадавальнік — Заўвага. TUT.BY) ёсць запасы, — кажа Кузняцоў.

Пасля яго сыходу Аляксандр Сталяроў папрасіў падпарадкаваную памяняць 5 тысяч долараў у банку і, як гучала раней у судзе, за гэтыя грошы дома ўсталяваў відэаназіранне. У фігуранта іншая версія: у банк не пайшоў сам, таму што там вялікія чэргі, а сістэму назірання ўсталёўваў за свой кошт.

Пасля пракурор зачытвае апісанне чарговага відэа:

— Сталяроў адкрывае канверт, тры разы хрысціцца і дастае нешта з пакета. Яго рукі знаходзяцца пад сталом, чутны шолах паперы, каля 50 гукаў (як пры пералічвае грошай. — Заўвага. Рэд.).

Нагадаем, 19 жніўня пачаўся масавы суд па «справе медыкаў». Абвінавачаных 20 чалавек, ім ставяць у віну два артыкулы Крымінальнага кодэксу: арт. 430 (Атрыманне хабару), арт. 431 (Дача хабару). За кратамі сем фігурантаў: дырэктар Цэнтра экспертыз і выпрабаванняў у ахове здароўя Аляксандр Сталяроў; яго намеснік Сяргей Зінчанка; начальнік кіравання медыцынскай тэхнікі Цэнтра экспертыз і выпрабаванняў у ахове здароўя Сяргей Ляшчылоўскі; генеральны дырэктар гандлёва-вытворчага рэспубліканскага ўнітарнага прадпрыемства «Белфармацыя» Вячаслаў Гніцій; намеснік генеральнага дырэктара Віцебскага гандлёва-вытворчага рэспубліканскага ўнітарнага прадпрыемства «Фармацыя» Кацярына Шнітко; генеральны дырэктар Гродзенскага РУП «Фармацыя» Андрэй Шчука і бізнесовец, дырэктар кампаніі «Искамед» Сяргей Шакуцін.

Усе яны абвінавачваюцца ў атрыманні хабараў, акрамя Шакуціна. Ён адзіны бізнесмен пад вартай. У судзе высьветлілася: Сяргей Шакуцін адмовіўся даваць паказанні падчас папярэдняга расследавання, ён гатовы выступіць у судзе.

tut.by


Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!