«Галасаваў супраць Лукашэнкі». Пракурор просіць тры гады «хіміі» для палітвязня Мазгова

Суд Ленінскага раёна Мінска разглядае крымінальную справу 26-гадовага спартсмена Алега Мазгова, якогда ўтрымлівалі пад вартай тры месяцы, а потым вызвалілі пад падпіску аб нявыезде.
Алег Мазгоў у судзе 28 студзеня. Фота: spring96.org

Алег Мазгоў у судзе 28 студзеня. Фота: spring96.org

За ўдзел у мітынгу 9 жніўня Алега Мазгова абвінавачвалі па ч. 2 арт. 293 Крымінальнага кодэкса (удзел у масавых беспарадках), але потым справу перакваліфікавалі на ч.1 арт. 342 Крымінальнага кодэкса (удзел у дзеяннях, якія груба парушаюць грамадскі парадак). 28 студзеня пракурор у судзе папрасіў для Алега тры гады "хіміі". Справу разглядае суддзя Юлія Шут.

Алега Мазгова абвінавачваюць у тым, што ён прыняў удзел у несанкцыянаваным масавым мерапрыемстве 9 жніўня, выходзіў на праезную частку, перакрываў рух транспарту супрацоўнікаў органаў унутраных справаў, прымушаў вадзіцеляў Мінсктранса ажыццяўляць вымушаную стаянку. У судовых спрэчках пракурор Рамановіч заявіў:

"Абвінавачаны галасаваў супраць Аляксандра Лукашэнкі, што, зрэшты, з'яўляецца яго правам, але пацвярджае пратэсны характар яго дзеянняў".

Паводле абвінавачвання, Мазгоў дзейнічаў у вячэрні час, яго актыўныя дзеянні суправаджаліся грубым парушэннем грамадскага парадку. Дзяржабвінаваўца лічыць, што віна Мазгова даказана цалкам, таму просіць суд пакараць яго трыма гадамі абмежавання волі з накіраваннем у папраўчую ўстанову адкрытага тыпу.

Сваю віну па ч. 1 арт. 342 Крымінальнага кодэкса Алег прызнаў цалкам.

Адвакатка Алега Мазгова звярнула ўвагу на шэраг змякчальных абставінаў: прызнаў віну, раскаяўся ў зробленым, жонка чакае дзіця.

Таксама абаронца Мазгова звярнула ўвагу, што першапачаткова справа супраць яго ўзбуджалася па арт. 293 Крымінальнага кодэкса: "Праз тры месяцы органы следства па ўзгадненні з пракуратурай палічылі магчымым змяніць яму меру стрымання. Гэта сведчыць аб тым, што органы праводзячы масу дзеянняў, пераканаліся ў тым, што падабаронны не ўяўляе небяспеку і можа быць вызвалены. Ён не прымаў больш ўдзелу ў масавых мерапрыемстваў. Фактаў прыцягнення да адміністрацыйнай адказнасці ў яго няма. Следчы орган палічыў магчымым знаходжанне яго на волі".

Па арт. 293 Крымінальнага кодэкса Мазгоў не прызнаваў віну, сітуацыя змянілася, калі яго справу перакваліфікавалі на арт. 342 Крымінальнага кодэкса. А ў счэпках і лозунгі выкрыквалі тысячы людзей, якія выходзілі са жніўня мінулага года. Па сутнасці, віна Мазгова пацвярджаецца фатаграфіяй, дзе ён стаіць у счэпцы. Але па словах абвінавачаных, ён прастаяў у ёй толькі некалькі хвілін.

Пракурор не згодны з адвакаткай: абвінавачаны знаходзіўся тры гадзіны на месцы здарэння: "Чаму пасажыры павінны пакутаваць і абмяжоўваць правы на свабоднае перамяшчэнне па горадзе? Чаму жыхары дамоў, у якіх ёсць маленькія дзеці, павінны адчуваць дыскамфорт і адчуваць усім сваім слыхам шум і ДАІ на вуліцы? Былі парушаныя законныя правы грамадзян".

Адвакатка падкрэсліла, што жыхары горада, калі і не могуць спаць, то гэта не па віне Мазгова.

Прысуд будзе абвешчаны 1 лютага.

spring96.org


Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: