Глеба Рубанава хочуць асудзіць цішком?

Глеба Рубанава раптам выклікаюць у Савецкі РУУС на 11 траўня. Хаця раней яму выдалі позву ў суд на 16 траўня.

«Не выключана нічога. З аднога боку, гэта роўна 72 гадзіны да раніцы панядзелка (пахне Акрэсціна). З іншага боку не выключаны разгляд адміністрацыйнай справы — у маім разуменні гэта можа адбыцца як у будынку РУУС (без гледачоў) так і ў судзе», — паведамляе Глеб.
Нагадаем, IT-кансультант Глеб Рубанаў быў затрыманы ў ноч з 6 на 7 траўня. Прыкладна ў 4:30 яго выманілі ў двор званком на хатні тэлефон: быццам нехта пашкодзіў яго аўтамабіль і трэба разабрацца. Але ў выніку міліцыянты сярод ночы завезлі яго ў Савецкі РУУС, дзе паведамілі пра затрыманне да суда.

Глеб Рубанаў правёў 31 гадзіну на Акрэсціна, там ён абвясціў галадоўку, быў пазбаўлены магчымасці спаць, бо па матрацы бегалі насякомыя.

Чытайце таксама:

«Вы яшчэ не ведаеце, што такое катаванні»

Раніцой 8 траўня Глеба Рубанава прывезлі ў Савецкі суд Мінска, дзе мусіў адбыцца разгляд яго справы за нібыта экстрэмісцкі пост у сацыяльных сетках. Але замест гэтага ў судзе Глебу ўручылі позву ў суд на 16 траўня — які, імаверна, цяпер можа не адбыцца ў прызначаную дату.




Хочаце ведаць больш? Сачыце за нашымі публікацыямі ў Telegram і Facebook!