Гомельскія медыкі стануць спонсарамі правядзеньня Дня гораду

Кіраўніцтва Гомельскай цэнтральнай гарадской паліклінікі прапанавала медыкам стаць спонсарамі Дня гораду 14 верасня, піша «Свабода».
Ілюстрацыйнае фота www.svaboda.org

Адпаведны дакумент трапіў у распараджэнне тэлеграм-канала блогера Nexta.


«Штогод з нас збіраюць грошы на Дзень гораду. Гэта такія ж абавязковыя зборы, як і на Чырвоны Крыж, падпіску. Летась здавалі па 4 рублі», — пацвердзіў Свабодзе на ўмовах ананімнасці адзін з супрацоўнікаў «хуткай дапамогі».

Гомельская цэнтральная гарадская паліклініка накіравала ліст галоўным урачам і загадчыкам філіялаў. Там гаворыцца, што «па даручэнні гарвыканкаму» каардынатар па зборы спонсарскай дапамогі да Дня гораду сярод медустаноў — цэнтральная паліклініка.

«Паліклініка даручае вам аказаць падтрымку ў прыцягненні спонсарскай дапамогі ў выглядзе пералічэння сродкаў на разліковы рахунак Гомельскага гарадскога цэнтру культуры да 26 жніўня», — пазначана ў дакуменце. Ён падпісаны выканаўцай абавязкаў галоўнага лекара Святланай Філіпковай.

У дакуменце пералічваюцца філіялы паліклінікі і сумы, якія яны «вінныя» на правядзенне Дня гораду. Усе філіялы абцяжараныя падтрымкай Дня гораду на суму 90 рублёў, акрамя паліклінікі № 1 — тая мусіць «прыцягнуць» 180 рублёў. Стаматалагічная паліклініка мусіць пералічыць 540 рублёў, дзіцячая — 630.

Супрацоўнікі гомельскіх шпіталяў, між тым, не збіраюць грошы на Дзень гораду. Пра гэта Свабодзе паведамілі супрацоўнікі Гомельскага абласнога клінічнага шпіталя і гарадскога спецыялізаванага клінічнага шпіталя.

У адміністрацыі цэнтральнай паліклінікі спраўдзіць інфармацыю пра зборы на Дзень гораду не ўдалося. На працягу працоўнага дня 16 жніўня выканаўца абавязкаў галоўнага лекара Святлана Філіпкова была недасяжная для каментароў.

 

 

Хочаце ведаць больш? Сачыце за нашымі публікацыямі ў Telegram і Facebook!