Human Constanta непакоіцца лёсам мігрантаў з Чачэнскай Рэспублікі, якіх злавілі на мяжы

16% вымушаных мігрантаў, якія звяртаюцца за статусам бежанца ў прапускным пункце Цярэспаль, падвяргаліся катаванням у краіне пражывання, 12% ратаваліся ад звычаю «кроўнай помсты» і 6,5% беглі ад хатняга гвалту.




Кансультацыйны цэнтр па актуальных міжнародных практыках і іх імплементацыі ў праве «Human Constanta» распаўсюдзіў заяву аб здарэнні на беларуска-польскай мяжы.

Як паведамлялася ў СМІ, 28 лютага беларускія памежнікі затрымалі двух грамадзян Расійскай Федэрацыі пры спробе незаконнага перасячэння беларуска-польскай мяжы. Як высветлілася, двое мужчын з'яўляюцца змушанымі мігрантамі з Чачэнскай Рэспублікі.

На працягу лютага 2018 года не менш за 16 разоў яны спрабавалі звярнуцца з просьбай аб прадастаўленні статусу бежанца да польскіх уладаў у памежным пункце Цярэспаль. Аднак у парушэнне міжнародных стандартаў польскія памежнікі ігнаравалі іх просьбы і адпраўлялі назад. Страціўшы надзею, мужчыны адважыліся на спробу незаконнага перасячэння мяжы.

Згодна з інфармацыяй, апублікаванай у артыкуле, зараз вырашаецца пытанне аб прыцягненні затрыманых да адміністрацыйнай адказнасці ў выглядзе дэпартацыі з забаронай ўезду ў Беларусь тэрмінам да 5 гадоў.

У нядаўна прадстаўленай Human Constanta справаздачы адзначалася, што 16% вымушаных мігрантаў, якія звяртаюцца за статусам бежанца ў прапускным пункце Цярэспаль, падвяргаліся катаванням у краіне пражывання, 12% ратаваліся ад звычаю «кроўнай помсты» і 6,5% беглі ад хатняга гвалту.

Польская памежная служба ў Цярэспалі штодня адвольна, без якіх-небудзь падстаў, адмаўляе большасці просьбітаў у прыёме заяў аб міжнароднай абароне і вяртае іх у Беларусь. Сем’і месяцамі вымушаныя жыць у Брэсце, спрабуючы на цягніку праехаць у Цярэспаль і перасекчы мяжу, кожны раз заяўляючы, што яны просяць разгледзець пытанне аб наданні статусу бежанца.

Пасля дзясяткаў беспаспяховых спроб у іх, як правіла, заканчваюцца грошы, альбо тэрмін знаходжання ў Беларусі. У такім выпадку яны вымушаныя вяртацца на радзіму, дзе ім пагражае небяспека.

Вяртанне гэтых людзей у Чачэнію можа пагражаць ім катаваннямі ці нават смерцю. Пасля таго, як людзей перадаюць чачэнскім уладам, сувязь з імі губляецца, іх адвакаты не могуць даведацца, дзе яны і што з імі адбываецца.

Зыходзячы з вышэйадзначанага, Human Constanta звяртаецца да польскіх ўладаў з заклікам забяспечыць на ўчастку мяжы Брэст-Цярэспаль выкананне нормаў міжнароднага і нацыянальнага права ў дачыненні да правоў іншаземцаў, якія шукаюць прытулак ад пераследу.

Human Constanta звяртаецца з просьбай да беларускіх уладаў устрымацца ад высылкі або «перадачы» праваахоўным органам Расійскай Федэрацыі грамадзян Расійскай Федэрацыі, якія выехалі з Паўночнага Каўказа, а таксама распрацаваць працэдуру эфектыўных прававых механізмаў абароны замежных грамадзян і асоб без грамадзянства ў выпадку іх вымушанай міграцыі з краіны паходжання.

 spring96.org

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: