Інваліду 2 групы пагражае год калоніі за абразу Лукашэнкі

Суд Хойніцкага раёна 12 лістапада пачаў разгляд крымінальнай справы паводле артыкулу 368 Крымінальнага кодэксу («Абраза прэзідэнта»), піша svaboda.org. Абвінавачаны — жыхар Гомеля, інвалід другой групы ў сувязі з анкалагічным захворваннем Аляксей Раманаў.


Ён актыўна ўдзельнічаў у агітацыйных пікетах штабу Святланы Ціханоўскай як валанцёр. На пікеце ў Хойніках 28 ліпеня негатыўна выказаўся пра Аляксандра Лукашэнку. Супраць Раманава распачалі крымінальную справу.

У крымінальнай справе зазначана, што Аляксей Раманаў, «маючы намер публічна абразіць прэзідэнта, наўмысна прамовіў словы і фразы ў непрыстойнай форме, якія, згодна з экспертызай, змяшчаюць негатыўную ацэнку прэзідэнта Аляксандра Лукашэнкі».

Аляксей прызнаў сябе вінаватым у тым, што абразіў чалавека Лукашэнку, але не прэзідэнта.

«Прэзідэнта я не абражаў. Бо я не лічу Лукашэнку прэзідэнтам, ён нелегітымны», — патлумачыў Свабодзе актывіст.

Паседжанне на патрабаванне пракурора Андрэя Судома праходзіла ў закрытым рэжыме. Пракурор запатрабаваў пакараць Аляксея калоніяй на адзін год. Адвакатка Рагнеда Тагай выказалася, што яе падабароннага варта пакараць штрафам.

Прысуд абвесцяць 18 лістапада.

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

  • Апошняе на сайце
,

Больш цікавага на «Новым Часе»: