Івонка Сурвіла: Зараз пра перадачу мандату БНР уладам Беларусі гаварыць немагчыма

Набліжаецца Дзень Волі. Старшыня Рады Беларускай Народнай Рэспублікі спадарыня Івонка Сурвіла адказала на пытанні Беларускае Радыё Рацыя.

 

Фота: radabnr.org

— Мы ўжо азнаёміліся з вашым зваротам. Найперш ён скіраваны да моладзі. Чаму? Бо, на маю думку, многія маладыя беларусы нават і не ведаюць, што тая Рада БНР, якая фактычна была заснаваная яшчэ ў 1917 годзе падчас Першага Усебеларускага кангрэсу, існуе дагэтуль і мае старшыню.

— Я звяртаюся да моладзі, бо сапраўды веру, што яна — нашая надзея. Толькі моладзь, якая не мае настальгіі па савецкім рэжыме, якую старэйшыя, на жаль, маюць, — чаго я зусім не разумею, дык моладзь, якая пабачыла рэшту свету, якая ведае, як жывуць іншыя краіны, як адносяцца да людзей, як цэняць сваю незалежнвсць і сваю волю, толькі гэтыя людзі змогуць нешта зрабіць для Беларусі.

— Хто сёння, на вашую думку, галоўны вораг Беларусі?

— Ён заўсёды быў — гэта наш усходні сусед. Ён заўсёды праяўляў імперыялістычныя амбіцыі, заўсёды стараўся сцерці нас з карты свету і ўгаварыць свет, што мы не існуем, што мы — частка Расіі. Яны гэта, на жаль, прадаўжаюць цяпер і вельмі актыўная прапаганда вядзецца. Вельмі страшна гэта, таму што старэйшы электарат наш, які мала ведае пра жыццё ў замежжы, можа паверыць, што Расія — іх добры сябра. Дык вось, гэта вельмі мяне непакоіць.

— Улады Беларусі зараз або ігнаруюць БНР, або замінаюць адзначаць Дзень Волі. Фактычна толькі ў Гродна і ў Мінску будуць больш-менш масавыя святкаванні сёлета. У той жа час даволі сціпла адзначаецца і 100-годдзе БССР. Хоць улады маглі б падкрэсліць менавіта, што яны пераемнікі гэтай фармацыі. На вашую думку, у чым прынцыповая розніца БНР і БССР?

— Гэта вельмі ясна сказана ў Трэцяй Устаўной грамаце. У ёй адзначаецца, што БНР пацвярджае ўсе тыя правы і вольнасці, якія абвешчаны Устаўной граматай ад 9 сакавіка 1918 года. Я іх пералічу, бо яны паказваюць, наколькі вялікая розніца паміж ідэаламі БНР і тым, чым быў БССР: вольнасць слова, друку, сходаў, забастовак, хаўрусаў і, безумоўная, сумлення, незачэпнасць асобы і памешкання. БССР паўстала дзякуючы БНР, але хутка сталася ізноў дэ-факта калоніяй Масквы.

— Ці ёсць у вас свае традыцыі святкавання 25 сакавіка? І як вы будзеце святкаваць сёлета?

— Я кожны год ад 1948 года святкавала 25 сакавіка. Гэта значыць ужо 70 разоў! У замежжы беларусы святкуюць разам. Ёсць вялікая імпрэза, выступаюць прамоўцы, а пасля — нацыянальны канцэрт. У гэтым годзе я буду ў Таронта і Атаве. Сёлета адбудзецца ўручэнне юбілейных медалёў 100-годдзя Рады БНР. Рада вырашыла ўзнагародзіць у Беларусі і ў свеце заслугі ў розных галінах жыцця людзей, якія спрычыніліся да здзяйснення нашых ідэалаў.

— Была ідэя, каб сімвалічна аформіць пераемнасць БНР і сучаснай Рэспублікі Беларусь. Як вы ставіцеся да гэтай ідэі?

— Рада можа перадаць свой мандат толькі дэмакратычна абранаму кіраўніцтву Рэспублікі Беларусь, якое б гарантавала захаванне незалежнасці Беларусі. Гэта для нас самае галоўнае. А цяпер Беларусь не забяспечаная гарантыямі суверэнітэту, менавіта таму, што яна не ўсведамляе каштоўнасці незалежнасці. Словы Лукашэнкі не падмацаваныя канкрэтнымі дзеяннямі. Зараз пра перадачу мандату немагчыма гаварыць.

www.racyja.com

Хочаце ведаць больш? Сачыце за нашымі публікацыямі ў Telegram і Facebook!