Яўген Батура шукае свой «БЧБмабіль», канфіскаваны міліцыяй. Слядоў аўто няма

Грамадскі актывіст Яўген Батура, у якога 23 чэрвеня міліцыя забрала аўтамабіль з бел-чырвона-белымі сцяжкамі, не можа дамагчыся адказу: дзе машына, за што арыштаваная і калі будзе вернутая.


 Яўген Батура 23 чэрвеня без тлумачэнняў быў затрыманы на праспекце Незалежнасці насупраць галоўпаштамта, дзе адбывалася акцыя салідарнасці з Эдуардам Пальчысам.

На акцыю Батура прыехаў на аўтамабілі, упрыгожаным бел-чырвона-белымі сцяжкамі. Супрацоўнікі ДАІ спынілі яго, пасадзілі ў міліцэйскую машыну і адвезлі ў Маскоўскі РАУС.

Потым заявілі, што машына лічыцца ва ўгоне, забралі ключы і аўто.

Яўген Батура ад таго часу ня можа дамагчыся адказу: дзе ягоная машына і калі будзе вернутая. У міліцыі патлумачылі, што супраць яго не вядзецца ніякай справы — ні крымінальнай, ні адміністрацыйнай, а машыну забралі на падставе рапарта супрацоўніка ДАІ, у якім той быццам бы «выказвае падазрэнне ў сапраўднасці нумара кузава», — піша на сваёй старонцы ў Фэйсбуку Яўген Батура. Машыну апісваў судовы аддзел Маскоўскага РУУС, праверку вядзе ўчастковы, якога актывісту параілі паспрабаваць самастойна адшукаць, папярэдзіўшы, аднак, што «прыёмных гадзінаў у таго няма».


Яўген звярнуўся па дапамогу да праваабаронцаў.

svaboda.org

Хочаце ведаць больш? Сачыце за нашымі публікацыямі ў Telegram і Facebook!