«Ён быў яшчэ жывы, сэрца білася»

Сабаку застрэлілі пасярод дня і кінулі ў сметнік.

Фота з архіву Аляксандра з Зэльвы.

У хатняга сабаку проста ў двары страляюць дроцікам з атрутай. Потым кідаюць у кантэйнер для смецця — паміраць. Гэткае дзікунства — беларускія рэаліі. 

Аляксандр з Зэльвы падзяліўся з «Белсатам» гісторыяй, што шакавала ягоную сямʼю.

Як забівалі Маркуса

 Сабака Маркус памёр на руках у свайго гаспадара. Былі сведкі адстрэлу. Паўжывога хатняга джэк-расэла гаспадары забралі са смеццевага кантэйнера.

 «Ён быў яшчэ жывы, сэрца білася, але ён не дыхаў. Я хутка павёз яго ў лякарню. Ветэрынар зрабіў укол, але гэта ўжо не дапамагло, бо надта вялікая была доза атруты, мы згубілі шмат часу. 30 хвілін я прасіў яго дыхаць, але лекар сказаў не мучыць, бо ў яго адміралі ўжо клеткі мазгоў і ён застаўся б непаўнавартасным, калі б і выжыў», — распавядае Аляксандр.

Гэта было пазней. А сведкам дзікунства стаўся сусед Аляксандра. Ён бачыў, як працаўнік ЖКГ страляў у сабаку.

«Сабака выбег з дому, бачна ж, што хатні. У яго ўсе прышчэпкі ёсць, радаслоўная. У нас вяліся работы, рамонт і ён выбег. Стрэліў нейкі паўцвярозы дворнік, пасярод белага дня», — піша ў лісце ў рэдакцыю Аляксандр.

 

Маркус, сабака Аляксандра з Зэльвы

Абураны гаспадар звярнуўся ў міліцыю. Там яму сказалі, што ён сам вінаваты, што сабака адзін гуляе. Нягледзячы на парушэнні правілаў адстрэлу з боку ЖКГ, участковы інспектар не захацеў разбірацца ў сітуацыі.

 «Сказаў, што патэлефануе мне пазней па маім пытанні. Дагэтуль тэлефануе», — кажа Аляксандр. Выдаткі на юрыстаў, каб займацца гэтай справай, занадта высокія для заробку жыхара раённага цэнтру. «Там кожная паперка каштуе 10 рублёў. Я не маю фінансавай магчымасці гэтым займацца».

Зэльвенскі ЖКГ пакінуў гэтае здарэнне без каментару.

 Чалавек са стрэльбай заўсёды мае рацыю?

 Падобная сітуацыя — не адзінкавая. У лютым Belsat.eu пісаў пра аналагічную сітуацыю ў Лунінцы. Там таксама проста на вуліцы адстрэльвалі сабак. Няшчасныя жывёліны не паміралі адразу, а некаторы час хадзілі па вуліцы, потым дворнікі кідалі іх у смеццевыя кантэйнеры.


Мы звязаліся з юрыстамі, каб высветліць, ці ёсць у такіх выпадках факт парушэння закону.

Сабака лічыцца безнаглядным, калі ён гуляе адзін без павадка і без гаспадара побач. У гэтым выпадку, па заканадаўстве нашай краіны, яго могуць адлавіць і павезці ў пункт часовага ўтрымання. Такім чынам, у гаспадара застаецца шанец знайсці сабаку і забраць яго, сплаціўшы штраф за парушэнне правіл нагляду за хатнімі жывёламі. Адстрэл прадугледжваецца толькі ў выключных выпадках — калі сабака небяспечны або агрэсіўны.

«На практыцы ж, адстрэльваюць у нас паўсюль, дзе ў бюджэце няма сродкаў на арганізацыю пунктаў часовага ўтрымання жывёлаў», — гаворыць Наста Жаўрыд, дырэктарка Цэнтру аховы жывёлаў «Анімалекс».

Адстрэл павінен праводзіцца ноччу, калі на вуліцы найменш людзей. Тым больш, застрэленага сабаку нельга выкідаць у кантэйнер для смецця, як адбылося з сабакам Аляксандра.

 На сметніку мёртвую жывёлу могуць пабачыць дзеці, не кажучы ўжо пра санітарныя нормы.

 «Гэта грубейшае парушэнне заканадаўства. Іх павінны вывозіць на скотамагільнікі, і на гэта, хутчэй за ўсё, у бюджэце павінны быць сродкі», — кажа Наста Жаўрыд.

У цэнтры па ахове жывёлаў «Анімалекс» раяць усё ж напісаць запыт да камунальных службаў, каб высветліць, хто і на якой падставе займаўся адстрэлам пасярод белага дня, а затым проста выкінуў сабаку на сметнік. Пасля на гэтай падставе падаць іск аб кампенсацыі маральнай і матэрыяльнай шкоды.


Вераніка Чыгір, belsat.eu

 

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: