Кобрын. Больш за 500 удзельнікаў Маршу міру і незалежнасці

30 жніўня больш за 500 жыхароў Кобрына на Брэстчыне паўдзельнічалі ў нацыянальным Маршы міру і незалежнасці.

Ад пляцу Волі па ходніках вуліцаў вакол цэнтру горада пад бел-чырвона-белымі сцягамі прайшлі кабрынчане розных узростаў і прафесій. Яны пратэставалі супраць фальсіфікацыі вынікаў прэзідэнцкіх выбараў і гвалту сілавікоў 10-12 жніўня падчас жорсткіх затрыманняў грамадзян і іх закратавання.

Удзельнікі маршу скандавалі «Кобрын, выходзь!», «Гэта наш горад!», «Лукашэнка, сыходзь!», «Лукашэнку ў аўтазак!», «Пераменаў!», «Свабоду палітвязням!», «Ганьба!», «Не забудзем, не даруем!», «Верым, можам, пераможам», «Сумленне на вуліцах гораду» і «Жыве Беларусь!» Месцічы цёпла віталі калону падчас маршу, а часам і далучаліся да яе.

Марш насіў выключна мірны характар. Грамадзяне праяўлялі цярпімасць да іншадумцаў і правакатараў, у адносінах да іх не дапускалі аніякіх праяваў агрэсіўнасці і нядобразычлівасці, а ўвогуле — аніякіх парушэнняў грамадскага парадку. Міліцыянты наглядалі за маршам з аўтамабіляў, але не перашкаджалі пратэстоўцам.

Пасля вяртання на пляц Волі сябра Кобрынскай грамадскай каардынацыйнай рады народнага даверу Віктар Гарбачэўскі выказаў падзяку ўсім, хто выйшаў на марш, і назваў іх сумленнем нацыі. Паводле яго, удзельнікі маршу адлюстроўваюць волю большасці беларусаў, на баку якіх праўда і Бог. "А паколькі людзі пазбаўляюцца страху, мы абавязкова пераможам і самі будзем вырашаць лёс сваёй краіны", — падкрэсліў спадар Гарбачэўскі.

Ён нагадаў, што цяперашні беларускі нацыянальны пратэст мае выключна мірны характар, заклікаў быць непахіснымі, салідарнымі і пільнымі, каб не дапусціць аніякіх правакацыяў. 

Сябра рады запрасіў падпісваць ліст за адкліканне дэпутата Палаты прадстаўнікоў Нацыянальнага сходу Рэспублікі Беларусь Васіля Дземідовіча, а таксама 9 верасня падтрымаць у судзе кабрынчаніна Алеся Брыштэна, якому 10 жніўня падчас падзеяў на цэнтральнай плошчы горада сілавікі зламалі руку.


Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: