Мінчанку затрымалі на плошчы Пераменаў, у судзе яна заявіла, што цяжарная. Ёй далі 25 сутак арышту

16 лістапада ў судзе Фрунзенскага раёна разглядалася справа мінчанкі Вікторыі, якую разам з мамай затрымалі ўчора на плошчы Пераменаў. Па словах дзяўчыны, яны не ўдзельнічалі ў мітынгу і не супраціўляліся міліцыі, як пазначана ў пратаколе. Таксама Вікторыя паведаміла суду, што напярэдадні зрабіла тэст на цяжарнасць, і ён аказаўся станоўчым. Суддзя Андрэй Млечка пастанавіў прызначыць адміністрацыйны арышт на 25 сутак.
Па матэрыялах справы, Вікторыю затрымалі 15 лістапада каля 16.40 каля дома на вуліцы Чарвякова, 62. Тут знаходзіцца так званая плошча Пераменаў, дзе ўчора сабраліся ўдзельнікі нядзельнага маршу. У пратаколе адзначана, што дзяўчына прыняла ўдзел у несанкцыянаваным мітынгу, таксама пры затрыманні адмаўлялася прайсці ў службовы транспарт для разбору ў Фрунзенскім РУУС, паводзіла сябе агрэсіўна, выказвалася нецэнзурнай лаянкай, упіралася, кідалася ў бойку, хапалася за форменнае абмундзіраванне міліцыянта. Па выніку ёй ставілі ў віну два артыкулы КаАП: ч. 3 арт. 23.34 (Паўторны за год удзел у несанкцыянаваным мерапрыемстве) і 23.4 (Непадпарадкаванне законнаму патрабаванню супрацоўніка міліцыі). Тлумачэнні па справе далі міліцыянты са змененымі дадзенымі (гэта супярэчыць ПВКаАП). Суддзя адмовіў у хадайніцтве выклікаць на працэс маму дзяўчыны, якая была сведкай затрымання.

Сама Вікторыя суду патлумачыла, што 15 лістапада сустрэлася з мамай у раёне ЦУМа, яны хадзілі па пакупкі. Пазней мама прапанавала пайсці на плошчу Пераменаў, дзе ніколі раней не была, але чытала пра яе ў навінах. Прымаць удзелу ў мітынгу, па словах Вікторыі, яны не планавалі. Таксама дзяўчына паведаміла суду, што напярэдадні, у суботу, зрабіла тэст на цяжарнасць, і вынік аказаўся станоўчым. Суддзя Млечка ўдакладніў, ці ёсць у затрыманай даведка з медустановы, якая пацвярджае яе цяжарнасць, на што Вікторыя патлумачыла, што планавала запісацца да ўрача ў панядзелак, але не паспела, бо яе затрымалі ў нядзелю.

Па законе, адміністрацыйны арышт не можа быць прызначаны цяжарнай жанчыне (ч. 2 арт. 6.7 КаАП). Журналісты спрабавалі атрымаць каментар у судзе Фрунзенскага раёна Мінска, аднак там толькі пацвердзілі рашэнне — 25 сутак арышту. Вікторыя на час судовага працэсу знаходзілася ў ізалятары на Акрэсціна.

tut.by

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: