Мінчука адправілі на прымусовае лячэнне пасля абразаў на адрас кіраўніка Беларусі

12 красавіка суд Фрунзенскага раёна Мінска вызваліў 79-гадовага жыхара сталіцы Аляксандра Лапіцкага ад крымінальнай адказнасці па артыкулах 391, 369, 368 Крымінальнага кодэкса («Абраза суддзі альбо народнага засядальніка», «Абраза прадстаўніка ўлады», «Абраза прэзідэнта Рэспублікі Беларусь») у сувязі з тым, што злачынства было здзейсненае грамадзянінам у стане неадэкватнасці.


Разам з тым суддзя Юлія Блізнюк прызнала мінчука псіхічна хворым і вынесла пастанову накіраваць яго на прымусовае псіхіятрычнае лячэнне. Інфармацыю пра гэта ГА “БАЖ” паведаміла памочніца старшыні Мінскага гарадскога суда Анастасія Шыльвян.


Віна Лапіцкага нібыта заключалася ў тым, што напрацягу апошніх гадоў ён рассылаў электронныя паведамленні ў розныя органы дзяржаўнай улады, у якіх нібыта былі знойдзеныя абразы, — расказаў прэс-службе ГА “БАЖ” праваабаронца Алег Волчак, які прысутнічаў на працэсе.


На думку Волчака, судовае рашэнне, вынесенае за адзін дзень, не з’яўляецца абгрунтаваным і адэкватным.


Адметна, што разам з пастановай суддзя вынесла прыватнае вызначэнне на адрас ТАА “Тут Бай Медиа”, на партале якога зарэгістраваная электронная паштовая скрыня, з якой Лапіцкі рассылаў уласныя паведамленні. Суддзя прадпісала ТАА “Тут Бай Медиа” спыніць доступ да электроннай паштовай скрыні з поўным яе выдаленнем.


Па словах Алега Волчака, бок абароны збіраецца абскардзіць вынесенае рашэнне, на што мае 10 дзён.

Закрыты ўладамі праваабарончы цэнтр "Вясна" 12 красавіка выступіў з заявай з нагоды судовага рашэння, пратэстуючы супраць крымінальнага пераследу за дыфамацыйныя формы выказвання меркавання.


Паводле baj.by


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: