Мінкультуры: мы не давалі дазвол на пракладку кабеля ля Курапатаў

Міністэрства культуры не давала дазвол на пракладку кабеля ў ахоўнай зоне Курапатаў. Пра гэта паведаміла першы намеснік міністра культуры Наталля Карчэўская ў адказе на зварот каардынатара грамадзянскай ініцыятывы «Эксперты ў абарону Курапатаў» да міністра культуры Юрыя Бондара.


Нагадаем, 29 лістапада ў вясковым доме культуры аграгарадку Лясны пад Мінскам адбылося грамадскае абмеркаванне ўздзеяння на навакольнае асяроддзе праекта кампаніі А-100 «Будаўніцтва жылога раёна з інжынерна-транспартнай інфраструктурай і аб’ектамі сацыяльна-гарантаванага абслугоўвання насельніцтва каля вёскі Копішча Мінскага раёна. Кабельныя лініі электраперадачы напружаннем 10 кілавольт».

Падчас грамадскага абмеркавання адзначалася, што ў ахоўнай зоне гістарычна-культурнай каштоўнасці міжнароднага значэння «Месца згубы ахвяраў палітычных рэпрэсій 1930-х – 1940-х гадоў XX стагоддзя ва ўрочышчы Курапаты» на паўночны захад ад яе раней была пракладзена дзеючая траса інжынерных камунікацый (для вады, газу, электрычнасці, цяпла, тэлефоннай сувязі і каналізацыі). Побач з гэтай дзеючай трасай зноўку ў ахоўнай зоне Курапатаў мяркуецца пракласці новую трасу пад кабель у 10 кілавольт.

Апроч таго, каля паловы даўжыні трасы запланаванай пракладкі кабелю ўздоўж Заслаўскай шашы таксама праходзіць не ў створы існуючай трасы інжынерных камунікацый ў паласе адводу аўтадарогі, а ў ахоўнай зоне Курапатаў.


Як стала вядома грамадскасці, архітэктары — аўтары праекта — не звярталіся да археолагаў Інстытута гісторыі Нацыянальнай акадэміі навук Беларусі з пытаннямі, што тычацца навуковага суправаджэння праекта.  

Паколькі пракладка ў ахоўнай зоне Курапатаў новага кабелю ў 10 кілавольт супярэчыць заканадаўству, аўтар звароту прасіў адклікаць адпаведныя дазволы на гэтыя працы, што выдала Міністэрства культуры.

Як патлумачыла Наталля Карчэўская, для разгляду па сутнасці зварот накіраваны па кампетэнцыі ў Мінскі райвыканкам, а для звесткі — у Нацыянальную акадэмію навук Беларусі.

Разам з тым, як стала вядома «Новаму Часу», 30 траўня 2016 года Міністэрства культуры ўзгадніла месца пракладкі кабелю ў паласе адводу Заслаўскай шашы ці ў яе прыдарожнай паласе, а праекціроўшчыкам прапанавала звярнуцца да археолагаў дзеля навуковага суправаджэння праекта.

Апроч таго, Міністэрства культуры ўзгадніла праектную дакументацыю па пракладцы кабелю на падставе таго, што ў ахоўнай зоне Курапатаў «дазваляецца эксплуатацыя і рэканструкцыя існуючых інжынерных камунікацый».


Такім чынам, на маё меркаванне, у апошнім узгадненні Мінкультуры закладзена памылка, бо плануецца пракладка новага кабелю, якога раней не было, бо не было жылога раёну ля вёскі Копішча, да якога гэты кабель пракладаецца.

Дарэчы, у ахоўнай зоне Курапатаў дазваляецца пракладка толькі тых падземных інжынерных камунікацый, што неабходныя для эксплуатацыі аб’ектаў ушанавання памяці ахвяраў, а не аб’ектаў іншага прызначэння.




Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: