Некалькі тысяч чалавек сабралася ля турмы на Валадарскага. Калона ідзе на Акрэсціна (фота, відэа)

Некалькі тысяч чалавек прыйшлі ўвечары 17 жніўня да СІЗА № 1 на вуліцы Валадарскага ў Мінску, паведамляе Tut.by.


Пляцоўка ля СІЗА на Валадарскага запоўненая цалкам. Па розных ацэнках, тут знаходзіцца 5-7 тысяч чалавек. Яны стаяць на ходніках і праезнай частцы. ДАІ перакрыла рух.
Фота Францішка Цярэшкі



Усе жадаючыя выступаюць у рэжыме вольнага мікрафона. Людзі перыядычна скандуюць «Выпускай!», «Лукашэнка ў аўтазак», «Ярмошыну ў турму», «Караева пад суд».

Сярод бел-чырвона-белых сцягоў каля мікрафона быў таксама і сцяг «Еўрасаюзу», але ўдзельнікі акцыі доўга скандавалі: «Прыбяры чужы сцяг», і сіні сцяг у выніку знялі.


У СІЗА № 1 на Валадарскага цяпер утрымліваецца блогер Сяргей Ціханоўскі, якога абвінавачваюць у падрыхтоўцы масавых беспарадкаў, і іншыя людзі, затрыманыя па так званай «справе Ціханоўскага». Людзі ля СІЗА неаднаразова скандавалі яго імя.

Тэлеграм-канал "Беларусь сейчас" паведамляе, што шматтысячная калона рушыла ад Валадарскага ў бок Акрэсціна, хаця валанцёры прасілі гэтага не рабіць: за ўсе шумы звонку затрыманых збіваюць.


Наша Ніва паведамляе, што ў шэсці бяруць удзел каля трох тысяч чалавек.

Падчас руху калоны да Акрэсціна, да яе ўвесь час падыходзяць людзі, які просяць не ісці да ізалятара, паведамляе карэспандэнт «Медыазоны».

"Кажа:" Ну не ідзіце на Акрэсціна". Потым сказаў: "Добра, ідзіце, але не сабатуйце". Затым сказаў: "Добра, хай пяць чалавек пойдуць і пераканаюцца, што там бяспечна". Увесь яго пасыл у тым, што натоўп можа парушыць працу валанцёрскага штаба", — паведамляе журналіст.

"Літаральна на падыходзе [да Акрэсціна], стаяць валанцёры і просяць не праходзіць. Яны распавядаюць пра АМАП", — кажа карэспандэнт.

"Калі ласка, не ідзіце туды, таму што там прыехала вельмі шмат аўтазакаў. Гэта ваенны аб'ект, будуць страляць. Патрэбна правакацыя для таго, каб прымяніць зброю. Калі ласка, не ідзіце туды", — распавядае журналісту "Медыазоны" жанчына, якая прадставілася валанцёркай лагера каля ізалятара.

TUT.by таксама перадае, што да дэманстрантаў падыходзяць людзі, якія просяць не ісці на Акрэсціна. "Але з гэтым катэгарычна не згодныя людзі на чале калоны", — піша выданне.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: