Падрыхтоўка да «выбараў»? Супраць анархіста распачалі крымінальную справу

Супрць актывіста анархісцкага руху Сяргея Раманава распачалі новую крымінальную справу за непадпарадкаванне правілам прэвентыўнага нагляду.
Сяргей Раманаў. Фота з сайта nn.by

Сяргей Раманаў. Фота з сайта nn.by

Пра гэта «Новаму Часу» распавёў паплечнік Сяргея Раманава, анархіст і былы палітвязень Зміцер Паліенка.

Сяргей Раманаў — гомельскі анархіст, летам 2019 года ён вызваліўся з калоніі, дзе адбываў пяцігадовы тэрмін за «паўторныя незаконныя дзеянні ў адносінах да выбуховых рэчываў». Маладога чалавека затрымалі 3 ліпеня 2014 года ў Бабруйску, калі ён ехаў аўтаспынам у Мінск. У заплечніку ў Раманава знайшлі 150 грамаў тратылу.

Як тлумачыў сам актывіст, пакеты з невядомым рэчывам ён знайшоў на рыбалцы ў раёне ракі Сож і вырашыў узяць з сабой. Што ўнутры, ён не ведаў, думаў, што гэта нейкія забароненыя рэчывы і збіраўся выдаць добраахвотна міліцыянтам, спадзеючыся, што такім чынам з яго могуць зняць рэшту тэрміну па першай справе за захаванне дома 14 грамаў пораха (ён высыпаў яго са старых іржавых, непрыдатных да выкарыстання патронаў і забыўся пра яго).

Але ў выніку на Раманава завялі крымінальную справу і асудзілі на 6 гадоў пазбаўлення волі, але пасля скаргаў знялі адзін год ад тэрміну. А дзяржаўнае тэлебачанне выпусціла сюжэт, у якім сцвярджалася, што Сяргей Раманаў рыхтаваў тэракт на Дзень незалежнасці ў Мінску.

Анархіст адбываў пакаранне ў ПК-2 у Бабруйску, дзе зазнаў ціск з боку адміністррацыі. Апошнія паўтара года тэрміну Раманаў знаходзіўся ў ПК-15, дзе перад вызваленнем суд Кастрычніцкага раёна Магілёва прызначыў яму прэвентыўны нагляд тэрмінам на 1 год.

Першае парушэнне Раманаў атрымаў 15 верасня, паколькі яго не было дома ў 3 гадзіны ночы, калі прыехалі інспектары з праверкай. Ён прызнаў сваю віну і адседзеў 5 сутак.

6 снежня Раманаў выйшаў на лесвічную клетку пасля 10 гадзін вечара, каб сустрэць хуткую дапамогу, бо яму стала дрэнна і падняўся ціск. Там ён сустрэў суседзяў і пакуль гаварыў з імі некаторы час, на лесвіцы з'явіўся маёр міліцыі з уключанай камерай на тэлефоне, які зафіксаваў, што Раманаў знаходзіўся за некалькі метраў ад кватэры. Па прыездзе хуткай Раманаву дыягнаставалі гіпертанічны крыз, зрабілі ўкол, адвезлі ў бальніцу, але ў шпіталізацыі адмовілі, паколькі яму стала лепш. Па гэтым парушэнні Раманаў віны не прызнаў, але адбыў 14 сутак арышту.

23 лютага 2020 года ён атрымаў трэцяе парушэнне за тое, што знаходзіўся ў кафэ. Тое, што там прадавалі на разліў спіртное, хлопец не заўважыў. Дый Раманаў зусім не ўжывае алкаголь, і ў той дзень зайшоў са знаёмым ва ўстанову папіць кавы і схавацца ад дажджу. Праз 5-10 хвілін у кафэ зайшоў міліцыянт з крымінальнага вышуку ў кампаніі чатырох супрацоўнікаў АМАПу, якія даставілі Раманава ў аддзяленне для апытання.

І вось 1 чэрвеня ў 9 раніцы па выхадзе з пад'езду да Сяргея Раманава падыйшлі двое аператыўнікаў з ГУБАЗіК. Аднаго з іх актывіст ужо ведаў, ён быў замацаваны за хлопцам для нагляду і, як сцвярджае Раманаў, для арганізацыі правакацый.

Пасля гэтага пад'ехаў бус з АМАПам і Раманава забралі ў Следчы камітэт, дзе паведамілі, што ў дачыненні да яго ўзбуджаная крымінальная справа па арт 421 КК (Непадпарадкаванне правілам прэвентыўнага нагляду).

Хлопца ўзялі пад варту, ён адмовіўся размаўляць са следчымі і трапіў у ІЧУ. На наступны дзень яго даставілі ў аддзел, дзе ў прысутнасці следчай і адваката ён даў тлумачэнні па гэтай справе. Віны не прызнаў, і следчая паабяцала падпіску аб нявыездзе пры ўмове, што Раманаў будзе з'яўляцца на яе выклікі. Ад адваката актывіст даведаўся, што дома, на лецішчы і ў бацькавым гаражы ГУБАЗіК правёў ператрусы — шукалі рэцэпты бомбаў і літаратуру. Канфіскавалі флэшкі і іншыя рэчы.

Цяпер у актывіста ёсць яшчэ прыкладна месяц на следчыя дзеянні, а пасля — на перадачу справы ў суд, які, мяркуе Раманаў, хутчэй за ўсё «закрые» яго на час «выбараў».

Сяргей Раманаў напісаў дзве скаргі па другім парушэнні, адна цяпер знаходзіцца на разглядзе ў прэзідыуме Вярхоўнага суда, другая — у Генпракуратуры. Ёсць шанец, што, калі хто небудзь з іх адменіць прысуд па адміністрацыйнай справе, то і крымінальная справа па 421 артыкуе разваліцца. Але гэта малаверагодна.

Затое цалкам рэальна, што Сяргея могуць адправіць у калонію на тэрмін да 1 года. З улікам такога хуткага рэагавання на найменшае парушэнне нагляду, якое разглядаецца судом у аднабаковым парадку, можна зрабіць выснову, што міліцыянты сочаць за Раманавым і маюць намер зноў «нейтралізаваць» яго перад будучымі «выбарамі».


Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: