Палітвязня судзяць за пудзілаў і налепкі «Пагоні»

Cуд Мінскага раёна 13 красавіка пачаў разглядаць крымінальную справу палітвязня Віктара Лосіка. Яго абвінавацілі паводле арт. 339, 341 Крымінальнага кодэкса.
Справу разглядае суддзя Новікава. Дзяржабвінавачванне падтрымлівае пракурор Касінская. Пацярпелыя — старшыня ўчастковай выбарчай камісіі ў Хацежына Радзько і яе намесніца Красоўская. Абедзве заявілі пазоў на выплату маральнай шкоды: па тры тысячы рублёў кожнай.

У чым абвінавацілі?

Палітвязня абвінавацілі ў тым, што павесіў на мосце пудзілы з фотаздымкамі міністра ўнутраных спраў і старшыні выбарчай камісіі Хацежынскага ўчастка для галасавання з надпісам «Не забудем, не простим!», а таксама ў нанясенні выяў з беларускім нацыянальным гербам «Пагоня» на збудаванні і апоры моста. Фотаздымкі пудзілаў былі размешчаны ў чаце «Хацежына для жыцця».


Што кажа палітвязень?

Віктар Лосік прызнаў віну па артыкуле 339 і не пагадзіўся з артыкулам 341, прынёс прабачэнні пацярпелым, пудзілы з фатаздымкамі якіх вывешваў: прызнаў усе тры факты вывешвання пудзілаў. Ён расказаў, што ў наваколлі Хацежына развешваў пудзілы па начах з інтэрвалам у 1-2 дні, а таксама наносіў на апоры мостаў, будынкі водапомпавай станцыі і электрашчытавой выявы з «Пагоняй»: не менш за 28 разоў. Хоць на фотапастцы выява невыразная, немагчыма апазнаць яго з поўнасцю, ён таксама прызнаў, што гэта ён сняты ў момант размяшчэння гербаў. Таксама распавёў, дзе набываў і хаваў пудзіла, як знаходзіў фотаздымкі. Адзначыў, што гэта было зроблена ў адчаі ад падзей лета-2020.

Ён распавёў, што быў назіральнікам на прэзідэнцкіх выбарах. Яго не дапусцілі ў памяшканне, таму быў вымушаны назіраць на вуліцы. Пратакол галасавання вывешаны не быў, яго паказалі праз дзверы а 12-й гадзіне ночы з выпраўленнямі і без усіх неабходных подпісаў. Віктар Лосік пісаў скаргі ў тэрытарыяльную камісію і ЦВК, адказаў па сутнасці не атрымаў: гэта і жорсткасць з боку МУС сталі для яго падставай для выражэння нязгоды. Ён выказаў яе ў вывешванні пудзілаў з прымацаванымі да іх фотаздымкамі Караева, старшыні і намесніцы старшыні раённай выбарчай камісіі Радзько і Красоўскай, работнікамі сельсавета (апошняя — дэпутатка ад іх акругі). Віктар Лосік адзначыў, што яго дзеянні былі накіраваныя супраць канкрэтных службовых асоб, вінаватых у фальсіфікацыі выбараў і гвалце, бо законнымі спосабамі дамагчыся праўды не было магчымасці.

Лосік папрасіў прабачэння ў пацярпелых, рахункі за псаванне маёмасці ў суме 43р., 54р., 25р. аплаціў у поўным памеры. Не лічыць псаваннем маёмасці і крымінальнай справай налепку «Пагоні» на бетонныя сцены. Пазовы пацярпелых лічыць празмернымі, але гатовы пакрыць шкоду.

На судзе Лосік заявіў, што пры дачы паказанняў на яго рабілася маральнае і псіхічнае ўздзеянне, раскаянне рабілася пад пераканаўчыя просьбы супрацоўнікаў РУУС. Але гэтую тэму падчас суда ён абмяркоўваць не захацеў.

Што казалі пацярпелыя?

Пацярпелая Радзько прад'явіла абвінавачанні наконт трох забітых у яе пудзіла цвікоў: гэтага ўчынку Лосік не прызнае і кажа, што заўсёды быў супраць гвалтоўных дзеянняў, таму не рабіў гэтага.

Пацярпелая Красоўская абвінавачвае Лосіка ў тым, што яе пудзіла пасля вывешвання на дарожным знаку было перанесена на могілкі і сфатаграфавана там з тэкстам «Памятаем. Любім. Смуткуем». Але гэты эпізод па справе Лосіку не ставіцца, хаця першапачаткова ў яго прызнаннях гэты факт ёсць.

Што яшчэ было на пасяджэнні?

Адвакат настойвае на кваліфікацыі дзеянняў па артыкуле 369. Ён адзначыў, што Лосік аказваў садзейнічанне ў расследаванні, дапамагаў пры выездзе на месца, добраахвотна даў свой тэлефон. А таксама раскайваецца, што абраў няправільны спосаб сваёй нязгоды.

Таксама падчас пасяджэння было адзначана, што бацькі Лосіка і яго жонка з дзецьмі маюць патрэбу ў дапамозе.  

Віктар Лосік быў членам ініцыятыўнай групы грамадзян Віктара Бабарыкі, збіраў подпісы ў яго падтрымку, быў валанцёрам у аб'яднаным штабе, дапамагаў ініцыятыве «Сумленныя людзі». На прэзідэнцкіх выбарах быў незалежным назіральнікам на ўчастку ў Хацежына. Віктар жанаты, у яго двое дзяцей.

Быў затрыманы 14 снежня 2020 г. у п. Хацежына Мінскага р-на супрацоўнікамі МУС.

spring96.org

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: