Пасольства ФРГ адкрыла Кнігу спачуванняў з нагоды трагедыі ў Берліне

Федэратыўная Рэспубліка Германія смуткуе па ахвярах акта насілля на калядным кірмашы каля Мемарыяльнай царквы кайзера Вільгельма ў Берліне 19 снежня, у выніку якога загінулі 12 чалавек і 48 атрымалі раненні.

У сувязі з гэтым Пасольствам Федэратыўнай Рэспублікі Германія будзе адкрыта Кніга спачуванняў у будынку Пасольства, вул. Захарава, 26. Запісы ў Кнігу спачуванняў можна будзе зрабіць у сераду, 21 снежня, з 14.00 да 17.00, у чацвер, 22 снежня, з 10.00 да 16.00, і ў пятніцу, 23 снежня, з 10.00 да 14.00.

У панядзелак увечары цягач з прычэпам, гружаны сталёвымі бэлькамі, праехаў каля 80 метраў па тэрыторыі каляднага рынку ў цэнтральнай частцы Заходняга Берліна. Ахвярамі трагедыі сталі 12 чалавек, 48 былі шпіталізаваны. У салоне цягача паліцыя выявіла забітага грамадзяніна Польшчы.

Здарэнне было кваліфікавана як тэракт. Мяркуецца, што перад тым, як заехаць у натоўп, злачынец скраў грузавік, які належаў польскай кампаніі, і забіў кіроўцу.

Неўзабаве пасля нападу берлінская паліцыя затрымала падазраванага, аднак на наступны дзень ён быў адпушчаны. У пракуратуры заявілі, што доказаў супраць яго не знайшлося. Выканаўца тэракту застаецца на свабодзе.

Адказнасць за тэракт узяла на сябе так званая «Ісламская дзяржава». Адпаведнае паведамленне распаўсюдзіла інфармагенцтва ІД «Амак».




Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: