Сілавікі разагналі адзінаццаты Марш мудрасці ў Мінску. Удзельнікаў затрымалі

У Мінску людзі пажылога веку сабраліся каля Чырвонага касцёла на адзінаццаты марш пратэсту супраць гвалту і беззаконня, перадае Радыё Свабода. ​
Марш мудрасці 14 снежня

Марш мудрасці 14 снежня

На апошніх маршах сілавікі не давалі пратэстоўцам рухацца праспектам Незалежнасці, блакавалі і рассякалі калону, затрымлівалі і судзілі ўдзельнікаў. Гэтак выйшла і цяпер.

Каля сотні пенсіянераў сабралася на плошчы Незалежнасці ў Мінску, яны мелі з сабой нацыянальныя сцягі. Паколькі праспект быў перакрыты, яны пачалі ладзіць акцыю на плошчы, вадзілі карагод вакол ёлкі і скандавалі «Уходи!», «Жыве Беларусь!» Плошчу атачылі жоўтыя аўтобусы і мікрааўтобусы з сілавікамі, карагод разагналі, удзельнікаў акцыі пратэсту затрымалі і заборалі ў аўтобусы.

15.15. Як піша канал «Мая краіна Беларусь», затрымалі ўсіх, каго маглі, а адпусцілі толькі Яна Грыба і Ніну Багінскую. Пасля завяршэння затрыманняў адкрылі ўваход на станцыю метро «Плошча Леніна».

15.00. Карагод пенсіянераў на плошчы Незалежнасці скончыўся. Цяпер вакол ёлкі стаяць сілавікі ў чорным.

14.55. Некаторыя ўдзельнікі акцыі адыйшлі на ганак Чырвонага касцёла.

14.50. Сілавікі атачылі плошчу Незалежнасці і пачалі затрымліваць пенсіянераў, якія вадзілі карагод вакол ёлкі, і адводзіць іх у аўтобусы, паведамляе Онлайнер. Сілавікі не прапускаюць да плошчы нават грамадскі транспарт.



14.45. Мінскі метрапалітэн закрыў уваход у вестыбюль станцыі Плошча Леніна з боку Плошчы Незалежнасці.

14.40. Праспект Незалежнасці перакрыты. Паводле каналу «Глаза Минска», ДАІ перакрыла выезд на праспект Незалежнасці з боку вакзалу і Інстытута культуры. Уздоўж праспекта стаяць аўтобусы сілавікоў.

Удзельнікі маршу скандуюць: «Уходи!»

14.38. На мінскі Марш мудрасці на плошчу Незалежнасці прыбылі сілавікі, патрабуюць разысьціся.

14.35. Пенсіянеры таксама збіраюцца і на мінскім вакзале, там іх каля 20.

14.30. Каля 20 пенсіянераў выйшлі на марш у цэнтры Гродна. Яны трымалі бел-чырвона-белыя парасоны, гукалі «Жыве Беларусь». Яны змянілі месца збору.

Цяпер іх не суправаджала міліцыя, але здымалі «людзі ў цывільным». Удзельнікі маршу разышліся, затрыманняў не было відаць.



14.25. Каля кінатэатру «Цэнтральны» стаяць вялікія жоўтыя аўтобусы без нумароў. Паводле відавочцаў, унутры аўтобусаў знаходзяцца сілавікі.



14.20. Марш мудрасці ў Мінску пачаўся з карагоду вакол ёлкі і скандавання: «Жыве Беларусь!»

14.15. Сярод удзельнікаў акцыі заўважылі Ніну Багінскую з нацыянальным сцягам і Яна Грыба.

14.00. Людзі пачалі збірацца ля Чырвонага касцёла. Сабралася каля сотні чалавек, ёсць нацыянальныя сцягі. Тут жа відаць машыны ДАІ.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: