Некалькі дзён родныя не ведалі, дзе хлопец, ён значыўся як «зніклы». Знайшоўся ў СІЗА КДБ

25-гадовы Мікалай Сасеў перастаў выходзіць на сувязь пасля 13 жніўня. Некалькі дзён сябры і родныя не маглі яго знайсці, у спісах праваабаронцаў ён значыўся як зніклы. Пазней яго знайшлі ў СІЗА — высветлілася, што Мікалая абвінавачваюць у арганізацыі масавых беспарадкаў.
Мікалай Сасеў

Мікалай Сасеў

Майго брата абвінавачваюць у арганізацыі масавых беспарадкаў, гэта артыкул 293, частка 2 Крымінальнага кодэкса, — распавёў «Новаму Часу» брат Мікалая Рыгор Сасеў. — Усё пачалося з таго, што ён перастаў выходзіць на сувязь 13 жніўня. Далей я пачаў шукаць яго па ўсіх установах і знайшоў у СІЗА КДБ. Потым яго перавялі ў СІЗА № 1 на Валадарскага.

Пра знікненне Мікалая Сасева паведамлялі і яго сябры. Апошняй з ім гаварыла яго сяброўка Алеся. Звязваліся яны, таму што 12 жніўня знік іх агульны сябар, каардынатар штаба Віктара Бабарыкі Ігар Ярмолаў. Мікалай і Алеся разам шукалі Ігара. Знайшлі ў ваенным шпіталі. Аказалася, што туды ён трапіў з СІЗА КДБ. Хлопца таксама абвінавачваюць у арганізацыі масавых беспарадкаў, супраць яго распачатая крымінальная справа па арт. 293 Крымінальнага кодэкса.

Па словах Рыгора Сасева, брата затрымалі ў Оршы, ён збіраўся з'ехаць з Беларусі, меркавана, у Расію. Ён баяўся, што, раз затрымалі яго сябра, то і яго могуць затрымаць. Ніякіх падрабязнасцяў затрымання Рыгор не ведае, але гаворыць. што яго не білі. У Мікалая ёсць адвакат, які яго наведвае. Па словах абаронцы, Мікалай адчувае сябе добра. Перадачы для яго прымаюць. Падрабязнасцяў справы брата Рыгор таксама не ведае, але перакананы, што яна сфабрыкаваная.


Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

  • Апошняе на сайце
,

Больш цікавага на «Новым Часе»: