Пракурор запрасіў 3,5 гады калоніі для гродзенца, у справе якога амапаўцы адмовіліся ад пазоваў

3,5 гады калоніі ўзмоцненага рэжыму запытаў 28 ліпеня пракурор Сяргей Пятрашка па справе Андрэя Сакалоўскага. За падзеі 6 верасня 2020 гродзенца абвінавацілі ва ўдзеле ў групавых дзеяннях, якія груба парушаюць грамадскі парадак, і гвалце над амапаўцамі. Раней яго асудзілі на тры гады калоніі з адтэрміноўкай за махлярства. Фактычна, гэтыя пакаранні могуць злучыць, піша hrodna.life.
На лаўцы — жонка Андрэя Алёна пасля судовага пасяджэння. Фота Алены Кавальчук

На лаўцы — жонка Андрэя Алёна пасля судовага пасяджэння. Фота Алены Кавальчук

Дырэктара прыватнай фірмы Андрэя Сакалоўскага судзіць Маргарыта Ланцэвіч у судзе Кастрычніцкага раёна Гродна. 38-гадовы Андрэй жанаты, у яго шасцігадовае дзіця. Андрэя абвінавацілі па ч.1 арт. 342 і арт. 364 КК. Паводле версіі дзяржабвінаваўцы Сяргея Пятрашкі, які замяніў Нічыпарука, 6 верасня 2020 года Андрэй прыняў актыўны ўдзел у групавых дзеяннях, якія груба парушаюць грамадскі парадак, і ўжыў гвалт у дачыненні да супрацоўнікаў органаў унутраных спраў.

Андрэй віну не прызнаў. На працягу следства ён не даваў паказанняў. Віну Андрэя даказваюць словы пацярпелых амапаўцаў і сведак, лічыць дзяржабвінаваўца. А адрозненні ў іх паказаннях, на яго думку, неістотныя.

Двух з 12 амапаўцаў адвакатка папрасіла выключыць з ліку пацярпелых. Чацвёра з пяцярых, якія заявілі пазовы аб кампенсацыі маральнай шкоды, пазней ад іх адмовіліся. Пацярпелы Лабкоў абяцаў удакладніць свае патрабаванні, але не з'явіўся на судовае пасяджэнне. Таму адвакатка папрасіла не прымаць яго пазоў да ўвагі.

Шкода за «блакаванне дарогі» і злачынства з «групай асоб»

Сярод іншага, Сяргей Пятрашка распавёў, як знайшлі Андрэя: яго ўбачылі на гарадскіх камерах, апазналі па татуіроўцы і праверылі, дзе быў яго тэлефон у гэты час.

Таксама Андрэй можа заплаціць 20 рублёў аўтобуснаму парку Гродна і 50 рублёў — тралейбуснаму ўпраўленню за шкоду, якую ён прычыніў, на думку дзяржабвінаваўцы. Адвакатка прапанавала размеркаваць суму на ўсіх удзельнікаў той акцыі.

Дзяржабвінаваўца прыбраў з абвінавачання прыкмету «з помсты» і «па папярэдняй змове». Тым не менш, ён лічыць, што злачынства здзейсніла «група асоб». Змякчальнай акалічнасцю ён палічыў наяўнасць малалетняга дзіцяці ў Андрэя.

Пасярэдзіне — Андрэй Сакалоўскі. Твары міліцыянтаў замазалі, бо раней журналістам намякалі, што гэта могуць палічыць «разгалошваннем асабістых даных». Фота: Алена Кавальчук

Пасярэдзіне — Андрэй Сакалоўскі. Твары міліцыянтаў замазалі, бо раней журналістам намякалі, што гэта могуць палічыць «разгалошваннем асабістых даных». Фота: Алена Кавальчук


Адвакатка: трэба апраўдаць

Сяргей Пятрашка запрасіў для Сакалоўскага два гады абмежавання волі па ч.1 арт. 342 КК і два гады пазбаўлення волі па арт. 364 КК. З улікам прысуду за махлярства (тры гады пазбаўлення волі) ён просіць прызначыць пакаранне ў тры з паловай гады калоніі ўзмоцненага рэжыму. Меру стрымання пакінуць ранейшай — заключэнне пад варту. Арышт з маёмасці дзяржабвінаваўца прапануе зняць.

Адвакатка просіць апраўдаць яе падабароннага. Яна настойвае: ніхто з амапаўцаў не можа дакладна сказаць, што менавіта Сакалоўскі нанёс яму пашкоджанні, па меддапамогу яны не звярталіся, рапарт пра гэта не пісалі, а пра некаторыя нюансы ўспомнілі толькі ў судзе. Да таго ж, Сакалоўскага ў той дзень не затрымалі, а значыць, ён не быў «актыўным удзельнікам».

2 жніўня ў 10.45 Андрэю дадуць апошняе слова. Пасля гэтага яму вынесуць прысуд.


Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: