Праз тры гады ў агулхарчы не будзе пластыкавага посуду

Намеснік міністра прыродных рэсурсаў і аховы навакольнага асяроддзя Аляксандр Корбут, паведаміў, што з 2023 года ў аб'ектах грамадскага харчавання могуць забараніць усе віды пластыкавага посуду.
Пры гэтым, па ягоных словах, аднаразовая забарона на выкарыстанне пластыкавага посуду не прадугледжваецца: будзе паэтапны пераход, каб галіны і бізнес падрыхтаваліся: «З 1 студзеня 2021 года плануецца забараніць толькі некаторыя віды такога посуду. Прадпрыемствам будзе дадзены пэўны тэрмін на тое, каб яны перабудавалі сваю вытворчасць. Поўная забарона пакуль прадугледжваецца з 2023 года», — сказаў Аляксандр Корбут.

З 1 студзеня 2021 года ўстанаўліваецца забарона на выкарыстанне і продаж у аб'ектах грамадскага харчавання аднаразовага пластыкавага посуду па пераліку, што вызначаецца Міністэрствам антыманапольнага рэгулявання і гандлю, паведамляе БЕЛТА. Распрацаваны адпаведны праект пастановы. Прадугледжваецца, што ў пералік увойдуць кантэйнеры, скрыні, латкі, ланч-боксы, палачкі для размешвання, пластыкавыя кубкі і талеркі. Размова ідзе пра посуд, які поўнасцю або часткова выраблены з полівінілхларыду і полістыролу. Пакуль прапануецца захаваць продаж і выкарыстанне ў абʼектах грамадскага харчавання аднаразовых пластыкавых накрывак для кубкаў, лыжак, відэльцаў, нажоў і кактэйльных трубачак. «Патрэба ў аднаразовым посудзе ў Беларусі ў год складае 200 млн адзінак. З іх прыкладна 70 млн – кубкі, 23 млн – лыжкі, 20 млн – відэльцы, 19 млн – нажы, астатняе – іншыя віды посуду», — адзначыў намеснік міністра.

У Беларусі палімерныя адходы складаюць 280 тыс.т у год (прыкладна 25 кг палімераў на аднаго жыхара). З іх 140 тыс.т — адходы ўпакоўкі. У 2019 годзе было сабрана ўсяго 35 працэнтаў ад усяго абʼёму ўтварэння палімерных адходаў.-0-


Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: