Расійскі партал для вандроўнікаў уключыў Віцебск у топ-3 гарадоў для паездак на 8 cакавіка

Па версіі партала для вандроўнікаў Travel.ru, Віцебск уваходзіць у топ-3 рэйтынгу прывабных гарадоў для падарожжаў на 8 cакавіка.  



У рэйтынг, апублікаваны на партале Travel.ru, увайшлі 20 гарадоў (з бюджэтам меншым за 100 еўра за суткі і коштам дарогі не вышэйшым за 140 еўра на чалавека), якія набралі большую папулярнасць у самастойных турыстаў за апошні год. Пры разліку бюджэту падарожжа на дваіх улічваліся суткі пражывання ў недарагім гатэлі з 8 на 9 сакавіка, абед у кафэ або рэстаране і наведванне славутага аб'екта.

Віцебск з бюджэтам 42 еўра апынуўся на трэцім месцы, саступіўшы толькі сталіцы Арменіі Ерэвану і гораду Нові-Сад (Сербія).

Складальнікі рэйтынгу адзначаюць, што ў Віцебску, які лічыцца культурнай сталіцай Беларусі, надзвычай гарманічна сышліся традыцыі мінулых эпох і модныя плыні сучаснасці. "Месца, якое нельга абысці бокам, гэта Віцебская ратуша. У ёй рэгулярна праводзяцца тэматычныя і творчыя вечары, арганізуюцца выстаўкі і іншыя мерапрыемствы, - адзначае партал для падарожнікаў. - Маляўнічыя мясціны Віцебска, які стаіць на беразе ракі Заходняя Дзвіна, не пакінуць вас абыякавымі, тым больш у такое цудоўнае свята".

У першую дзясятку рэйтынгу ўвайшлі таксама Бітала (Македонія) з бюджэтам 43 еўра, Канстанца (Румынія) - 46 еўра, Тарту (Эстонія) - 47 еўра, Гданьск (Польшча) - 48 еўра, Кутаісі (Грузія) - 50 еўра, Пльзень (Чэхія) - 51 еўра і Каўнас (Літва) - 52 еўра.

У тройку самых дарагіх гарадоў для падарожжа на 8 Сакавіка трапілі нямецкі Гамбург (73 еўра за суткі), фінскі Турку (91 еўра) і бельгійскі Антверпен (94 еўра).

БЕЛТА

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: