Расійскія сыркі і эскімо з кішэчнай палачкай знайшлі ў Лідзе і Навагрудку

Гэтую прадукцыю забаранілі для ўвозу ў нашу краіну, паведамляе Еўрарадыё.

У Лідзе і Навагрудку выявілі расійскія малочныя прадукты з кішэчнай палачкай. Пра гэта агенцтву БЕЛТА паведаміла галоўны дзяржаўны інспектар аддзела дзяржнагляду горада Ліда Гродзенскай абласной інспекцыі Дзяржстандарту Ірына Квочкіна.

Гаворка ідзе пра глазураваныя сыркі з заменнікам малочнага тлушчу і марозіва эскімо з заменнікам малочнага тлушчу.

Продаж гэтых сыркоў і марозіва забаронены. Акрамя таго, спецыялісты забаранілі пастаўкі гэтай прадукцыі ў Беларусі, а таксама спынілі і дзеянне дэкларацыі пра адпаведнасць на тэрыторыі краіны.

Па словах Квочкінай, сыркі зробленыя з натуральнага тварагу і малака пры належных умовах захоўваюцца да 15 сутак, марозіва — шэсць месяцаў. "Калі на ўпакоўцы пазначана, што тэрміны захоўвання вышэйшыя, можна меркаваць, што ў склад уваходзяць кансерванты ды іншыя кампаненты, якія падаўжаюць тэрмін прыдатнасці. Таму варта ўважліва чытаць і аналізаваць інфармацыю пра склад прадуктаў", — дадала спецыялістка.

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!