Сяргей Вакуленка аспрэчвае сваё звальненне ў судзе

У судзе Маскоўскага раёна Брэста адбылося судовае пасяджэнне аб устанаўленні факта дыскрымінацыі ў сферы працоўных адносін на прадпрыемстве «Дэльфа-Буг» па іску былога работніка прадпрыемства Сяргея Вакуленкі.



 Сяргей Вакуленка 31 ліпеня быў звольнены без тлумачэння прычын — за два гады да атрымання пенсіі.

Беспадстаўнае звальненне актывіст лічыць помстай за яго прынцыповую пазіцыю ў сферы абароны працоўных правоў. Пратэстуючы супраць незаконнага звальнення, ён пайшоў на адчайны крок – галадоўку.

Сяргей Вакуленка распавёў Радыё Рацыя:

— Я расказаў, дзея я працаваў, як працаваў. Акрамя таго, наймальнік, намеснік дырэктара Патапчук Ігар Антонавіч сказаў, што за перыяд працы на прадпрыемстве да дысцыплінарнай адказнасці не прыцягваўся, адзначаўся прэміямі, працуе, як працуюць і ўсе. То-бок, негатыву не было.

Суддзя Таццяна Рэвуцкая задаволіла хадайніцтвы аб выкліку сведкаў і прадастаўленні патрэбных для разгляду справы папер. Яна спачувальна паставілася да фізічнага стану Вакуленкі і прапанавала яму адказваць седзячы.

Другое пасяджэнне суда пройдзе 12 жніўня ў 11 гадзін.

Беларускае Радыё Рацыя

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!