Скараспелыя спецыялісты: да чаго можа прывесці ініцыятыва новага міністра адукацыі

Кіраўнік Мінадукацыі Ігар Карпенка анансаваў скарачэнне тэрмінаў навучання прыкладна па 50 спецыяльнасцях у ВНУ — да 4-4,5 гадоў. Эксперты патлумачылі, чаму без захаплення ўспрымаюць гэты крок.

Дунаеў: Скарачэнне тэрмінаў навучання можа не даць таго эфекту, на які разлічваюць прыхільнікі рэформы

Сябар грамадскага Балонскага камітэта і былы прарэктар ЕГУ Уладзімір Дунаеў адзначае, што па многіх спецыяльнасцях навучанне ўжо вядзецца па скарочаных тэрмінах і называе анансаваны крок лагічным, калі зыходзіць з таго, што Беларусь узяла на сябе абавязацельства рэалізоўваць еўрапейскую трохпрыступкавую мадэль адукацыі.

— Але скарачэнне тэрмінаў навучання ў ВНУ можа не даць таго эфекту, на які разлічваюць прыхільнікі рэформы, — кажа пры гэтым прафесар.

Уладзімір Дунаеў лічыць, што галоўная праблема ў тым, што калі ў еўрапейскіх краінах школьнікі атрымліваюць сярэднюю адукацыю 12-13 гадоў, то ў Беларусі яно скарочана да 11-ці, што прыводзіць да невысокай якасці.

 Па выніках цэнтралізаванага тэставання мы бачым, што ўзровень падрыхтоўкі абітурыентаў гнятліва нізкі. За 11 гадоў яны не паспяваюць нармальна асвоіць праграму, — адзначае прафесар.

Уладзімір Дунаеў лічыць, што скарачэнне тэрмінаў навучання ў ВНУ павінна ісці разам з аднаўленнем 12-гадовага навучання ў школе.

— Проста скарачэнне тэрмінаў навучання ў ВНУ — гэта нязначны крок. Праблемы трэба вырашаць комплексна, — кажа ён.

Мажэйка: Акадэмічная супольнасць ўспрыме новаўвядзенні негатыўна

Эксперт Ліберальнага клуба Вадзім Мажэйка лічыць, што больш важна не тое, колькі будуць вучыцца студэнты ў ВНУ — 3, 4 ці 5 гадоў, а то па якіх праграмах і з якой кваліфікацыяй выкладчыкаў.

Пры гэтым ён упэўнены, што анансаваны міністрам адукацыі крок будзе успрыняты акадэмічнай супольнасцю негатыўна.

— Выкладчыкі заўсёды кансерватыўна падыходзяць да такіх пытанняў. Акрамя таго, памяншэнне нагрузкі азначае скарачэння для выкладчыцкага складу, — кажа Вадзім Мажэйка.

У цэлым эксперт Ліберальнага клуба нейтральна ставіцца да скарачэння тэрмінаў навучання ў ВНУ.

— На мой погляд, гэта ні добра, ні дрэнна. Я не схільны драматызаваць сітуацыю і думаць, што з-за гэтага кадры, якія будуць выпускацца, стануць менш прафесійнымі.

Можна толькі пашкадаваць аб тым, што не анансавалася больш істотныя і карысныя змены, — кажа Вадзім Мажэйка.

Паводле Заўтра тваёй краіны

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Абмеркаванне:

  • ВР
  • 2017-02-02 11:52:49
Рэалізацыя ідэі можа дабіць навуку ў Беларусі, якая і так не на ўздыме: http://belisrael.info/?p=9337

Больш цікавага на «Новым Часе»: