Слонімцы і рух «Дзея» патрабуюць фінансавай справаздачы

Усе пункты, на якія былі выкарыстаны фінансы, не выкананы.



Канал Агінскага ў Слоніме, пачатак ХХ стагоддзя.

Сябры рэспубліканскага грамадскага руху “Дзея” пад кіраўніцтвам Алеся Лагвінца працягваюць збор подпісаў наконт таго, каб Слонімскі райвыканкам даў падрабязную публічную справаздачу адносна выкарыстаных грашовых сродкаў з канкрэтным указаннем працаў, выдаткаў і адказных установаў наконт атрыманых Слонімскім раёнам ў 2016 годзе фінансавых сродкаў у рамках праекту «Садзеянне развіццю на мясцовым узроўні ў Рэспубліцы Беларусь», фінансаваным Еўрапейскім саюзам і Праграмай развіцця ААН у суме каля 60 000 долараў ЗША, а таксама ахвяраванні грамадзянаў і прадпрыемстваў Слонімшчыны ў суме каля 35 000 беларускіх рублёў з абвешчанымі планамі:

1) добраўпарадкаванне і рэканструкцыя малога канала Агінскага і прылеглыя да яго тэрыторыю і аб’екты;

2) усталяванне ў горадзе Слоніме помніку Міхаілу Казіміру Агінскаму.

3) добраўпарадкаванне тэрыторыі Слонімскага замчышча з узнаўленнем макету палаца М.К.Агінскага.

4) арганізацыя турыстычнага трансгранічнага маршруту Украіна-Беларусь-Літва праз Дняпро-Прыпяць-Вялікі канал Агінскага-Шчара-Нёман;

– падкрэсліваючы важнасць далейшых намаганняў па прыцягненні інвестыцыяў і турыстаў у Слонімскі раён з мэтай стварэння новых працоўных месцаў і магчымасцяў на мясцовым узроўні;

– дбаючы пра добрае кіраванне, празрыстасць і мэтавае выкарыстанне атрыманых і ў будучыні сабраных грашовых сродкаў на мясцовае развіццё Слонімшчыны.

 

Канал Агінскага ў Слоніме, 1930-я гады.

Сябры “Дзеі” прапануюць таксама правесці шырокае публічнае абмеркаванне з абавязковым удзелам грамадзянскай супольнасці і незалежных сродкаў масавай інфармацыі, у прыватнасці «Газеты Слонімскай», і прыняць пакрокавую публічную Праграму развіцця турыстычнай інфрастуктуры Слонімскага раёну, у асаблівасці, далейшай рэканструкцыі і развіцця Каналу Агінскага ўлучна са стварэннем лодачнай станцыі, якая існавала ў міжваенны перыяд. Зрабіць неабходныя захады да адпаведных уладаў Беларусі, каб ініцыяваць унясенне зменаў ва Указ №462 ад 26.12.2017 г., „Аб усталяванні бязвізавага парадку ўезду і выезду замежных грамадзянаў” з мэтай уключэння Слонімскага раёну ў турысцка-рэкрэацыйную зону „Брэст”. 

Дарэчы, усе пункты, на якія былі выкарыстаны фінансы, не выкананы. Не з’явіўся ў Слоніме помнік Агінскаму, няма макета палаца Агінскага, не добраўпарадкавана тэрыторыя канала і г.д. Сябрамі “Дзеі” ужо сабрана каля 200 подпісаў. Збор подпісаў працягваецца, ён тут. 

Беларускае Радыё Рацыя


Хочаце ведаць больш? Сачыце за нашымі публікацыямі ў Telegram і Facebook!