Стала вядома, дзе будзе адбываць хімію Лявон Халатран

Лявон Аляксандравіч Халатран — валанцёр штаба Віктара Бабарыкі, кіраўнік «Ruin Bar Ok16». Сёння Лявон атрымаў накіраванне для адбыцця пакарання ва ўстанову адкрытага тыпу. У нядзелю ён павінен прыбыць у вёску Сушкі ў Камянецкім раёне Брэсцкай вобласці.

Фота Дзмітрыя Дзмітрыева

Фота Дзмітрыя Дзмітрыева


— Больш за ўсё я буду сумаваць па сваёй сям'і, асабліва па сыну, адбіраць у дзяцей бацькоў — гэта жорстка і недаравальна. Але ўсведамленне ўласнай правасці надае сіл. Усім дабра і любові! — кажа Лявон.

Мінскі гарадскі суд 30 красавіка пакінуў у сіле прысуд палітвязню Лявону Халатрану — два гады абмежавання волі ва ўстанове адкрытага тыпу, так званай «хіміі». Пасля рашэння суда прайшло больш за месяц, і ўвесь гэты час палітвязень жыў у чаканні дня, калі яму давядзецца ехаць адбываць пакаранне.

— Па-першае, я ведаю, што многія атрымалі яшчэ большыя тэрміны ў больш жорсткіх умовах. Па-другое, я ўключаю свайго даследчыка і думаю, наколькі гэта будзе цікава — сустрэцца з рознымі слаямі грамадства і новым досведам. А па-трэцяе, я хачу паказаць, што гэта не страшна. Вы хочаце парушаць закон — добра, мы падпарадкуемся, але потым вы за гэта адкажаце. Я паеду і прайду праз гэта — людзі і большае праходзілі, — выказваў сваё стаўленне да будучага пакарання Лявон у інтэрв'ю «Новаму Часу» неўзабаве пасля рашэння Мінгарсуда.

Лявон Аляксандравіч Халатран — валанцёр штаба Віктара Бабарыкі, кіраўнік «Ruin Bar Ok16».

11 жніўня Лявон выйшаў са сваёй кватэры на вуліцы Гая і быў затрыманы. Яму выставілі абвінавачанне па ч.2 арт. 293 КК РБ («Удзел у масавых беспарадках»). Некалькі дзён блізкім Лявона нічога не было вядома пра яго месцазнаходжанне. 14 жніўня яго адпусцілі пад падпіску аб нявыездзе і накіравалі на медыцынскую экспертызу ва ўпраўленне Следчага камітэта. Сям'я і сябры бачылі, як Лявон заходзіў у будынак, і былі гатовыя яго сустрэць, але ўстанова зачынілася, а Лявона так і не выпусцілі. Праз некалькі гадзін стала вядома, што меру стрымання змянілі на ізалятар. 9 кастрычніка была верагоднасць, что Халатрана адпусцяць пад асабістае даручальніцтва, але гэтага не адбылося.

Пазней артыкул Лявону Халатрану перакваліфікавалі на ч. 1 арт. 342 КК («Групавыя дзеянні, што груба парушаюць грамадскі парадак»). 19 лютага палітвязень асуджаны на два гады абмежавання волі з накіраваннем у папраўчую ўстанову адкрытага тыпу. З прызначанага тэрміну Лявону засталося адбываць пакаранне крыху менш за год.

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: