Старшыню АГП Казлова будуць судзіць… за адмову даць падпіску аб неразгалошванні

Кіраўнік Аб’яднанай грамадзянскай партыі 12 студзеня зноў наведаў цэнтральны апарат Следчага камітэта, каб даць паказанні па крымінальнай справе супраць заснавальнікаў Каардынацыйнай рады.

Гэта ўжо трэці паход Мікалая Казлова ў СК, але кожны раз ён адмаўляўся даваць паказанні, спасылаючыся на артыкул 27 Канстытуцыі — нікога нельга прымусіць даваць паказанні супраць самога сябе, распавядае «Наша Ніва».

У выніку Казлоў так нічога не сказаў, але з яго ўсё адно патрабавалі падпісаць паперку аб неразгалошванні. Палкоўнік Аксана Перастэнка паўтары гадзіны настойвала, каб палітык падпісаў паперку, але з гэтага так нічога не выйшла.

Гэтаксама Казлова допытвалі 30 снежня і 5 студзеня. Кіраўнік АГП лічыць справу «нічым неабгрунтаванай». «Допыты праходзяць з адзінай мэтай, каб надзёргаць нейкіх цытат, а з іх зляпіць абвінавачванне», — кажа палітык.

«У вельмі многіх пытаннях стаіць прыпіска аб «пагрозе нацыянальнай бяспецы». Я не вытрымаў і спытаў, ці засталіся яшчэ правы, якія не пагражаюць нацыянальнай бяспецы, мне на гэта нічога не адказалі. Мне здаецца, што падпіскай аб неразгалошванні яны хочуць прыкрыць тое глупства і непрафесіяналізм, які бачны ў гэтай справе».

На допыт 12 студзеня прыйшоў участковы Партызанскага раёна Мінска, які забраў палітыка і яго адваката ў апорны пункт міліцыі, дзе склаў адміністрацыйны пратакол па артыкуле 23.4 «Непадпарадкаванне». Парушэнне заключаецца ў тым, што Казлоў адмовіўся даць падпіску аб неразгалошванні. Суд прызначаны на 15 студзеня а 11:00.

Казлову пагражае штраф ці 15 сутак зняволення.


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: