Суд у Віцебску спыніў справу супраць журналіста, суддзя папрасіла прабачэння

Суд Першамайскага раёна Віцебска 28 верасня разгледзеў справу журналіста тэлеканала «Белсат» Дзмітрыя Казакевіча, якога абвінавачвалі ва ўдзеле ў несанкцыянаваным мітынгу ў цэнтры горада 9 жніўня — пасля таго, як закрыліся ўчасткі для галасавання.
Зміцер Казакевіч, фота з фэйсбука

Зміцер Казакевіч, фота з фэйсбука

Дзмітрыя Казакевіча затрымалі на пачатку дзясятай гадзіны вечара 9 жніўня ў цэнтры Віцебска — на плошчы Перамогі. Ён прыйшоў рабіць рэпартаж пра падзеі, якія там адбываліся: міліцыя перакрыла ўсе подступы да плошчы, на ёй стаялі аўтазакі, там знаходзілася шмат сілавікоў. Неўзабаве пачаліся масавыя затрыманні гараджан.

У аўтазак патрапілі і тры журналісты — акрамя Казакевіча, у ІЧУ апынуліся аператар «Белсата» Вячаслаў Лазараў і фотакарэспандэнт інтэрнэт-газеты «Народныя навіны Віцебска» Ігар Мацвееў.

За парушэнне часткі 1 артыкула 23.34 КаАП суддзя суда Першамайскага раёна Віцебска Міхаіл Юрчанка пакараў Дзмітрыя Казакевіча 10 суткамі адміністрацыйнага арышту. З іх журналіст правёў у ізалятары пяць, на волю выйшаў 14 жніўня, калі па ўсёй Беларусі масава адпускалі людзей, затрыманых пасля выбараў.

Пазней рашэнне раённага суда адмяніў абласны суд. Справу адправілі на новы разгляд.

Першае пасяджэнне адбылося 14 верасня. Незалежны журналіст з дапамогай адваката даказваў, што не ўдзельнічаў у акцыі, а выконваў прафесійныя абавязкі.

Суддзя Міхаіл Юрчанка тады накіраваў справу ў міліцыю на дапрацоўку.

Новае пасяджэнне прайшло праз два тыдні, 28 верасня. Працэс вяла ўжо іншая суддзя — Вераніка Барысава.

У матэрыялах справы (рапарце і пратаколе супрацоўніка вайсковай часці 5524) гаворыцца, што Змітра Казакевіча затрымалі 9 жніўня прыблізна 21.20 каля дома № 7 на Маскоўскім праспекце — там знаходзіцца рэстаран «Журавінка». Пры гэтым ён скандаваў разам лозунгі і знаходзіўся ў групе людзей, якія на не дазволенай уладамі акцыі выказвалі нязгоду з вынікамі апошніх выбараў.

На працэсе выступілі тры сведкі затрымання Казакевіча — віцебскія журналісты. Усе яны заявілі, што бачылі Дзмітрыя не каля рэстарана "Журавінка", а прыкладна ў 500 метрах ад гэтага месца — на мемарыяльнай частцы плошчы Перамогі.

Журналісты пацвердзілі, што Казакевіч прыйшоў на плошчу, каб рабіць рэпартаж — як міліцыя разганяе гараджан. Пры гэтым лозунгаў ён не выкрыкваў, ніякай сімволікі і плакатаў не меў. З ім знаходзіўся ягоны калега — аператар Вячаслаў Лазараў. Затрымалі іх ўдваіх, у адзін час. Зрабілі гэта супрацоўнікі міліцыі, а не вайскоўцы.

Суддзя апытала таксама сведку з боку абвінавачання — кантралёра в \ ч 5524 Віталя Грудзінскага. Прыйсці ў суд ён не змог — з-за вучэнняў, і Вераніка Барысава мела зносіны з ім па вайберы.

Суддзя папрасіла Казакевіча падысці да манітора ноўтбука, каб Грудзінскі змог яго ўбачыць і апазнаць. Ваеннаслужачы паглядзеў на яго і паведаміў, што не ведае такога чалавека:

 Я яго не ведаю. Магчыма, мы і дастаўлялі ў РАУС або ІЧУ гэтага грамадзяніна. Але я вам дакладна не скажу: ён гэта ці не.

Віталь Грудзінскі растлумачыў суду, што ён і яго калегі з в \ ч 5524 ўвечары 9 жніўня не затрымлівалі людзей у цэнтры Віцебска:

— Мы працавалі ў групе канваіравання. Гэта значыць міліцыя затрымлівала грамадзян, прыводзіла іх да нас, а мы іх толькі адвозілі ў ІЧУ або РАУС. Я асабіста ў той вечар канваяваў каля 10 чалавек. Ніякіх дакументаў на затрыманых нам не перадавалі, пратаколаў адміністрацыйнага затрымання мы не складалі. Наша функцыя была толькі ў адным — даставіць людзей у РАУС.

Віталь Грудзінскі заявіў, што рапарт, які падпісаны яго прозвішчам і ў якім паведамляецца, што Дзмітрый Казакевіч скандаваў лозунгі, пісаў не ён:

— Гэта не мой рапарт. І подпіс у ім — не мой.

Прадстаўнік в \ ч 5524 адмаўляў і тое, што склаў на Казакевіча пратакол:

— Не, я нічога такога не складаў, почырк тут не мой, і подпіс не мой.

Вераніка Барысава абвясціла ў судзе перапынак да 16 гадзін.

Пасля перапынку Вераніка Барысава спыніла адміністрацыйную справу — за недаказанасцю віны Дзмітрыя Казакевіча ў парушэнні заканадаўства аб правядзенні масавых мерапрыемстваў.

Журналіст не хавае, што ашаломлены.

— Суддзя Вераніка Барысава публічна прынесла мне прабачэнне ад імя суда. Я такога не чакаў! Гэта прэцэдэнт у Беларусі пасля выбараў, каб журналіст, якога абвінавачвалі ва ўдзеле ў несанкцыянаванай акцыі, выйшаў з суда невінаватым. Але я планую падаваць пазоў на кампенсацыю маральнага і матэрыяльнага ўрону — пяць сутак я правёў у ІЧУ, — паведаміў TUT.BY Дзмітрый Казакевіч.

У агульнай складанасці пасля выбараў Дзмітрыя Казакевіча затрымлівалі тройчы. Першы раз — падчас міліцэйскага разгону гараджан на плошчы Перамогі ўвечары 9 жніўня. Другі раз — 6 верасня, калі журналіст вяртаўся з рэпартажу на маршы салідарнасці і не дайшоў да дома метраў 500. І трэці раз — раніцай 11 верасня каля суда Першамайскага раёна, куды карэспандэнт прыйшоў, каб асвятляць адміністрацыйны працэс.

У цэлым за ўвесь час затрыманняў Казакевіч правёў у ІЧУ амаль 9 сутак.

tut.by

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: