Фота: концептуал.рф
«Дакладнага падліку мы не вялі. Будзем арыентавацца на папярэднія амністыі, якія праходзілі пры нашай падрыхтоўцы». «Хутчэй за ўсё, будзем прапаноўваць амніставаць пэўныя катэгорыі асоб. Гэта воіны-інтэрнацыяналісты, ветэраны войнаў, ваенных канфліктаў, бацькі-адзіночкі, у якіх ёсць непаўналетнія дзеці, інваліды па здароўі, чарнобыльцы і гэтак далей. Магчыма, па некаторых складах злачынстваў будзе прапанавана, вельмі часта пытаюцца пра наркатычны артыкул — 328-ы (незаконны абарот наркатычных сродкаў, псіхатропных рэчываў, іх прэкурсораў і аналагаў. — заўв). Мяркую, што можна разгледзець пытанне, і я таксама буду гэта прапаноўваць, — скараціць на год адбыццё пакарання некаторым катэгорыям асуджаных па гэтым артыкуле», — заявіў міністр.
Ігар Шуневіч адзначыў, што законапраект будзе ў бліжэйшы час падрыхтаваны і ўнесены ў парламент, каб яго паспелі разгледзець да Дня Незалежнасці. Як паведамлялася, у канцы лютага кіраўнік Беларусі Аляксандр Лукашэнка на сустрэчы са старшынём Вярхоўнага суда Валянцінам Сукалам даручыў сумесна з МУС распрацаваць законапраект аб амністыі ў сувязі з 75-годдзем вызвалення Беларусі ад нямецка-фашысцкіх захопнікаў.
«Апошняя амністыя ў нас была чатыры гады таму. Улічваючы, што гэта юбілейная дата, амністыя можа быць шырэй, чым яна праходзіла звычайна. Можа закрануць асоб, якія адбываюць пакаранне, у плане скарачэння тэрмінаў пазбаўлення волі», — адзначаў тады ў гутарцы з журналістамі Валянцін Сукала.
Бізнес-трэнерка Марына Мацулевіч, сын якой асуджаны па арт. 328 на вялікі тэрмін зняволення, інфармацыю аб маючай амністыі ўспрыняла з пэўным скепсісам:
«Я асабіста лічу, што была б правільная амністыя па 328, якую прапанавалі мамы ў сваёй петыцыі. Улады прызналі, што не ўсе суддзі дзейнічалі ў рамках закона, а ўсталяваць гэта магчыма толькі пры пераглядзе спраў. Таму зараз важна максімальна зняць напружанне ў грамадстве. І даць людзям надзею, што ўлада ўсвядоміла, што па 328 былі дапушчаныя памылкі першапачаткова. А адзін год – гэта будзе ні пра што.
Акрамя таго, трэба спыніць працэс, калі справы фабрыкуюцца, калі не ўлічваецца добраахвотная выдача, садзейнічанне, першапачаткова не правільна афармляюцца дакументы. Усе допыты па 328 павінны здымацца на камеру, так як справа тычыцца вельмі часта непаўналетніх і маладых людзей, каб потым не было пытанняў, хто вінаваты і якія памылкі былі дапушчаныя на этапе следства.
