У Беларусі адзначаюць галоўнае афіцыйнае свята

У Беларусі адзначаюць галоўнае афіцыйнае свята — Дзень Незалежнасці. Рашэнне святкаваць Дзень Незалежнасці 3 ліпеня было прынята падчас рэспубліканскага рэферэндуму 1996 года. 
Рэпетыцыя парада. Чэрвень 2017 г.

Рэпетыцыя парада. Чэрвень 2017 г.

Цэнтральнай падзеяй афіцыйных урачыстасцяў стане ваенны парад войскаў Мінскага гарнізона. Прамая трансляцыя мерапрыемства, якое пачнецца ў 10.00, будзе весціся па тэлебачанні і радыё. Аляксандр Лукашэнка ў якасці галоўнакамандуючага Узброенымі сіламі Беларусі прыме парад і выступіць з прамовай.


Лукашэнка даручыў не шкадаваць сродкаў на правядзенне парада да Дня Незалежнасці. "Сродкаў на гэта шкадаваць не трэба, тым больш яны не такія ўжо і вялікія. Ён павінен быць сапраўдным парадам, які ўражвае. Для гэтага і праводзіцца. <...> Бо ёсць што паказаць, і гэта надоўга застаецца ў памяці людзей", — заявіў кіраўнік дзяржавы на сустрэчы з міністрам абароны Андрэем Раўковым у канцы мая.

Паводле інфармацыі Міністэрства абароны, на парадзе будзе прадстаўлена 30 злучэнняў і вайсковых часцей, задзейнічана каля 6 тысяч ваеннаслужачых, больш за 500 адзінак колавай і гусенічнай тэхнікі. Упершыню будуць прадстаўлены авіяцыя МНС і ДТСААФ, ваенныя верталёты Мі-8МТВ-5 і Мі-24, ваенна-транспартныя самалёты Ан-26 і Іл-76, вучэбна-баявыя Як-130 і Л-39, знішчальнікі МіГ-29 і штурмавікі Су-25.

У Мінску сёння па ўсім горадзе будуць праводзіцца канцэрты, разнастайныя спаборніцтвы, выставы і кірмашы. Так, на пляцоўцы каля Палаца спорту з 11.30 да 23.00 адбудзецца вялікі канцэрт прафесійных і самадзейных творчых калектываў, выстава-кірмаш майстроў народнай творчасці, святочны кірмаш. З 12.00 да 15.00 тут пройдзе міжнародны турнір па сілавым экстрыме, а ў акваторыі Свіслачы — адкрытае першынство Мінска па парусным спорце.

Вялікі канцэрт пройдзе з 11.30 да 23.00 і на тэрыторыі Верхняга горада. Там жа можна будзе ўбачыць гістарычную рэканструкцыю "Шлях да незалежнасці".

У 21.00 на пляцоўцы каля стэлы "Мінск — горад-герой" пачнецца гала-канцэрт рэспубліканскай грамадска-культурнай акцыі "Беларусь маладая мая...", а ў 22.50 — традыцыйная акцыя "Праспяваем гімн разам". Святочны салют будзе дадзены з 23.00 да 23.10, пасля чаго каля стэлы працягнецца канцэртная праграма, якая завершыцца ў 1.00.

Святочныя мерапрыемствы пройдуць ва ўсіх адміністрацыйных раёнах сталіцы — у Мінскім заапарку (з 12.00), Лошыцкім парку (з 11.00), на пляцоўцы перад кінатэатрам "Салют" (з 11.00), парках імя М.Паўлава (з 10.00), "Курасоўшчына" (з 13.00), 60-годдзя Кастрычніка (з 12.00), "Цівалі" (з 13.00), парку Перамогі (з 12.00), у Цэнтральным дзіцячым парку імя Горкага (з 12.00), у Цэнтральным батанічным садзе (з 13.00), у Камароўскім скверы (з 12.00).

На ўзмоцнены рэжым нясення службы сёння пераведзены супрацоўнікі МУС, МНС, работнікі хуткай медыцынскай дапамогі.

Рашэнне святкаваць Дзень Незалежнасці 3 ліпеня было прынята ў ходзе рэспубліканскага рэферэндуму 1996 года. Да гэтага галоўнае дзяржаўнае свята адзначалася 27 ліпеня — яно было прымеркавана да даты падпісання Вярхоўным Саветам БССР у 1990 годзе Дэкларацыі аб суверэнітэце Беларускай Савецкай Сацыялістычнай Рэспублікі.

Беларуская апазіцыя не прызнае афіцыйны Дзень Незалежнасці, лічачы, што адлік незалежнасці дзяржавы варта весці з моманту абвяшчэння Беларускай Народнай Рэспублікай Дэкларацыі аб дзяржаўным суверэнітэце 25 сакавіка 1918 года. Штогод прадстаўнікі апазіцыі і іх прыхільнікі святкуюць 25 сакавіка Дзень Волі.

Пяць дзён таму апазіцыйны палітык Мікалай Статкевіч паведаміў Мінгарвыканкаму аб намеры правесці 3 ліпеня ў 14.00 святочны сход на Кастрычніцкай плошчы. Ён заклікаў сталічныя ўлады выканаць патрабаванне Канстытуцыі і забяспечыць "бесперашкоднае i бяспечнае правядзенне масавага мерапрыемства".

Хочаце ведаць больш? Сачыце за нашымі публікацыямі ў Telegram і Facebook!