У Гомелі збіраюць подпісы за цалкам беларускамоўны дзіцячы садок

У горадзе над Сожам абмеркавалі стан беларускамоўнай адукацыі. Гомельскі дэмакратычны форум зладзіў сустрэчу для бацькоў, якія б хацелі, каб іх дзеці вучыліся на роднай мове і наведвалі беларускамоўны садок.

Юлія Сівец і Мікола Бянько з сынам

Сваім досведам арганізацыі беларускамоўнага выхавання падзялілася сям’я Міколы Бянько і Юліі Сівец, чый трохгадовы Стась сёлета так і не здолеў пайсці ў садок, дзе б з ім размаўлялі па-беларуску.

Мікола і Юлія распавялі пра тое, як кіраўніцтва дзіцячага садка, куды яны меліся сёлета аддаць свайго сына, зладзілі так званае “апытанне бацькоў”. Высвятлялі, ці варта адкрываць у дашкольнай установе беларускамоўную групу, якую ініцыявалі бацькі Стася.

 «У піянеры прымаюць без апытанняў, а ў садок трэба збіраць групу праз апытанне»

Найперш, кіраўнікі адукацыйнай установы паставілі ўмову, што групу створаць пры ўмове, што Мікола і Юлія змогуць сабраць у яе як мінімум 19 чалавек. Чаму менавіта столькі — ніхто патлумачыць так і не здолеў. Зразумела, што сабраць такую колькасць трохгадовых дзетак, ды яшчэ каб бацькі мелі магчымасць штодня вазіць іх у гэты садок, не атрымалася. Але Мікола з Юляй не гублялі надзеі дамагчыся беларускамоўнай групы.

Тады чыноўнікі ад адукацыі зладзілі ў садку «апытанне». Бацькам прапанавалі анкету, праз якую меліся высветліць, ці патрэбная ў садку беларускамоўная група. Шэсць сем’яў ініцыятыву падтрымалі, іншыя выказаліся супраць. Група з беларускай мовай так і не з’явілася.

Сустрэча бацькоў, якія б хацелі, каб іх дзеці вучыліся на роднай мове

«Калі дзяцей прымаюць у піянеры ці ў БРСМ, ніхто не праводзіць апытанняў, галасавання бацькоў ці нечага такога. Увогуле ні ў каго не пытаюць, ці хоча нехта туды ўступаць. А як пытанне датычыць беларускай мовы, сістэма адукацыі рэзка ўключае дэмакратыю», — гаворыць Юлія Сівец. 

 

Юлія Сівец і Мікола Бянько

«Мы лічым, што дзіцячы садок з беларускай мовай выхавання ў Гомелі павінен быць створаны. А ўжо зрабіць яго найлепшай, элітарнай дашкольнай установай, каб туды імкнуліся аддаць сваё дзіця жыхары гораду, мы зможам», — дадае Мікола Бянько.

Вялікай папулярнасцю сярод гамельчукоў карыстаюцца курсы «Мова Нанова», вядоўцамі якіх менавіта і з’яўляюцца Мікола і Юлія. На курсах «Мова дзяцей», якія вядзе старшыня гомельскай суполкі ТБМ Алеся Аўласевіч, увогуле нечаканы ні для каго аншлаг — сюды прыводзяць сваіх малых каля 70 сем’яў. Размаўляць па-беларуску вучацца дзеці самых розных узростаў.

 Чыноўнікі не вераць у папулярнасць беларускай мовы

Гарадскія ўлады не вераць, што ў Гомелі ёсць зацікаўленасць у стварэнні беларускамоўных садкоў ці школаў.

«Чыноўнікі з упраўлення адукацыі крыўдзяцца: маўляў, вы ж кажыце ўсім, што мы «за» беларускія садкі і школы, але ж бацькоў, ахвочых туды аддаць дзіця, няма», — гаворыць Алеся Аўласевіч.

На сустрэчы склалі адпаведны зварот аб стварэнні ў горадзе цалкам беларускамоўнага дзіцячага садка. Цяпер збіраюць подпісы. Актывісты дамовіліся стварыць базу бацькоў, якія маглі б паўдзельнічаць у змаганні за права выхоўвацца і вучыцца па-беларуску, і сумесна каардынаваць намаганні.

 Андрусь Гаёвы, belsat.eu

  

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

  • Апошняе на сайце
,

Больш цікавага на «Новым Часе»: