У Магілёве пачалі судзіць журналіста Алеся Асіпцова. Ён трымае галадоўку. Абноўлена

Суд у Магілёве над журналістам Алесем Асіпцовым пачаўся 12 траўня каля 9.30. Асіпцоў трымае галадоўку ад 9 траўня.​
Суддзя бяз маскі

Суддзя бяз маскі

Пазаштатны карэспандэнт БелаПАН Алесь Асіпцоў быў затрыманы за нібыта адміністрацыйнае правапарушэньне, але за якое, не было вядома да самага суду.

На працэс не пусьцілі дачку журналіста Яніну і актывістаў, якія прыйшлі яго падтрымаць.

Суд адбываецца ў кабінэце судьдзі, быццам усе залі занятыя і ў сувязі з эпідэміялягічнай сітуацыяй. Сама суддзя была бяз маскі.

Асіпцоў перад судом распавёў, што яго затрымалі, калі ён фатаграфаваў людзей, якія зьбіраліся зладзіць акцыю «Антыпарад».

Паводле журналіста, да яго падышоў міліцыянт і паведаміў, што ён мусіць прайсьці зь ім, бо на яго заведзеная адміністрацыйная справа. Пазьней Алесь Асіпцоў даведаўся, што справу супраць яго завялі за ўдзел у сустрэчы з блогерам Сяргеем Ціханоўскім.

Алесь Асіпцоў віны не прызнае: ён заяўляе. што працаваў на той сустрэчы як журналіст. Паводле Асіпцова, яго везьлі ў аддзел міліцыі з парушэньнем нормаў санітарыі, ён выказваў пратэст, а потым абвясьціў галадоўку.

З 21.00 9 траўня Алесь Асіпцоў на знак пратэсту не прымае ежу, у судзе ён сказаў, што адчувае сябе блага. Аспіцоў дадаў, што максымальнае пакараньне яму толькі дадасьць гучнасьці гэтай незаконнай, на яго думку, справе. Судзьдзя не задаволіла хадайніцтва Асіпцова і ягонага адваката аб правядзеньні працэсу ў судовай залі.

Журналіст Алесь Асіпцоў знік пасля акцыі “Антыпарад” у суботу, 9 мая, і дадому не вярнуўся.

Як распавяла журналістка з Бабруйску Марына Маўчанава, з самай раніцы Алесь быў з ёй на сувязі, яны сазваніваліся і распавядалі адзін аднаму, што дзе ў горадзе адбываецца. У 12.38 Марына чарговы раз яму патэлефанавала. Асіпцоў распавёў, што сеў у машыну да ўдзельнікаў акцыі і яны разам недзе ездзяць па горадзе. А ўжо праз некаторы час калегі журналіста пачалі пісаць, што ён не выходзіць на сувязь.

Алесь Асіпцоў — пазаштатны карэспандэнт “БелаПАН”. Жыве ў Магілёве. У Бабруйск прыехаў асвятляць акцыю аўтамабілістаў “Антыпарад”, якая планавалася на Дзень перамогі.

Падчас “Антыпараду” затрымалі каля 20 чалавек — удзельнікаў акцыі. Вечарам іх сталі адпускаць, але ці ўсе выйшлі на волю — дакладна невядома.

Паводле калегаў Асіпцова, і яны, і ягоная жонка ўчора тэлефанавалі ў бабруйскія УУС і РАУС, а таксама ў ДПС, там не далі ніякай дакладнай інфармацыі пра Алеся, а жонцы параілі пісаць заяву аб знікненні.Толькі каля 19 гадзіны вечара жонцы журналіста афіцыйна паведамілі, што Алесь Асіпцоў сапраўды знаходзіцца ў ізалятары часовага ўтрымання ў Магілёве. Прычыну не патлумачылі.

Алесю Асіпцову суддзя Наталля Ясенка прысудзіла 10 сутак арышту. Журналіст заявіў, што мае намер працягваць галадоўку пратэсту.

baj.by

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: