У Магілёве знеслі помнік Леніну. Раней за завод

У Магілёве разам з заводам штучнага валакна дэмантавалі і помнік Леніну. У скверыку, разбітым перад адміністрацыйнымі будынкамі прадпрыемства, замест помніка застаўся груд бетоннага друзу і пяску паведамляе «Радыё Свабода».


Замест помніка Леніну груд бетоннага друзу і пяску

Замест помніка Леніну груд бетоннага друзу і пяску

Завадскую дошку гонару не кранулі. Закінутым застаецца фантан, які ўпрыгожваў сквер, над якім і узвышалася постаць Леніна ў поўны рост.

Знікненне помніка, які хавалі елкі, не заўважылі мінакі.

«І праўда прыбралі», — сказаў адзін з іх і дадаў: «Як заводу няма, што яму тут рабіць».

Пабураны завод запусцілі ў 1930-я гады. У тыя часы прадпрыемства стала найвялікшым у горадзе. На ім працавала больш за дзве тысячы чалавек. У Магілёў прыехала шмат спецыялістаў-хімікаў з іншых рэгіёнаў Савецкага Саюзу.

 

Помнік Леніну яшчэ цэлы (фота з восені 2017 году)

Пра намеры закрыць завод упершыню загаварылі ў студзені 2012 года. Тады гэта называлася рэарганізацыяй. Вырабляць сінтэтычную плёнку стала нерэнтабельна. Прадаць прадпрыемства не ўдалося.

 

Напамін пра савецкае мінулае і пра сам завод, які амаль пабурылі, захоўвае цяпер толькі дошка гонару

Пабурыць завод даў даручэнне Аляксандр Лукашэнка. Работы маюць завяршыцца сёлета ў траўні. Помнік Леніну да гэтага часу не дастаяў.

 


Хочаце ведаць больш? Сачыце за нашымі публікацыямі ў Telegram і Facebook!

Каментаваць