У Мінску з'явіцца вуліца Алеся Дудара

Сталічныя ўлады назвалі вуліцы імёнамі міністра ўраду БНР, дыверсанта НКВД і расстралянага паэта, паведамляе Радыё Свабода.
Мінскі гарадскі савет дэпутатаў пастанавіў надаць назвы некаторым часткам Мінска, дзе маюць з'явіцца новыя вуліцы і паркі.

Праектаваную вуліцу ў межах Партызанскага праспекта, вуліц Куляшова і Шышкіна назвалі імем савецкага памежніка, дыверсанта НКВД і кіраўніка выведнага аддзелу КДБ Яўгена Міркоўскага.

Праектаваную вуліцу між вуліцамі Янкі Лучыны і Чыжэўскіх – імем беларускага навукоўца, аднаго з заснавальнікаў Беларускай Народнай Рэспублікі, міністра сельскай гаспадаркі БНР Аркадзя Смоліча, расстралянага бальшавікамі ў 1938 годзе.

Праектаваную вуліцу ад Ігуменскага тракта да вуліцы Чыжэўскіх – імем беларускага савецкага кампазітара Уладзіміра Алоўнікава.

Праектаваную вуліцу ад Ігуменскага тракта да вуліцы Смоліча – імем беларускага паэта Алеся Дудара, расстралянага бальшавікамі ў 1937 годзе.

Пешаходную зону ад Свята-Духавага кафедральнага сабора да вуліцы Багдановіча – Казьма-Дзям'янаўскім спускам.

Парк між вуліцамі Пляханава, Ванеева і Райніса – імем кіргізскага пісьменніка Чынгіза Айматава.

Парк між вуліцай Даўгабродскай, завулкам Казлова і Сляпянкай – імем дыпламата і былога старшыні Мінгарвыканкама Аляксандра Герасіменкі.

Даследчыца жыцця і творчасці Алеся Дудара, настаўніца Ганна Севярынец казала Свабодзе, што з Дударом амаль адгадалі: цалкам магчыма, што ён хацеў завулак свайго імя. Але Дудар, кажа яна, жыў не ў тым раёне, дзе яго імем назавуць вуліцу: не ў Лошыцы, а на вуліцы Правадной, што паблізу Інстытута культуры.

Хочаце ведаць больш? Сачыце за нашымі публікацыямі ў Telegram і Facebook!

Абмеркаванне:

  • ВР
  • 2018-06-06 11:59:39
Я не супраць вуліц Дудара і Смоліча. Але шкада, што не запатрабаваныя ў мінскай тапаніміцы асобы з гэтага спісу: http://belisrael.info/?p=4484
І прапанову Саюза беларускіх пісьменнікаў назваць у Мінску вуліцу імем Гервасія Вылівахі (гл., напрыклад, тут: http://orsha.eu/rus/новости/3329/ ) улады праігнаравалі...
  • Олег Белютин
  • 2018-06-07 10:35:58
Во Франции, как известно, не трогают памятники разных эпох. Там стоят памятники лидерам революции, которые сражались по разные стороны баррикад. И это правильно.
  • Люстэрка
  • 2018-10-29 16:57:04
Вуліцы з імёнамі акупантаў і бандытаў з чужых краін ва Францыі таксама ёсць? Назавіце.