У сталіцы Паўночнай Ірландыі не сціхаюць беспарадкі

Пагромшчыкі ў Белфасце зноў закідалі паліцэйскіх «кактэйлямі Молатава». Удзельнікі беспарадкаў не пачулі заклікаў лаяльных Лондану пратэстантаў прыпыніць акцыі ў святле скону прынца Філіпа.
Беспарадкі ў Паўночнай Ірландыі не цішэюць ужо некалькі дзён і неаднаразова прыводзілі да сутыкненняў з паліцыяй. Пагромшчыкі на поўначы Белфаста вечарам у пятніцу, 9 красавіка, закідалі паліцэйскіх камянямі і бутэлькамі з запальнай сумессю, а таксама падпалілі аўтамабіль і кантэйнер для смецця. Па дадзеных BBC, некалькі вартавых парадку атрымалі раненні. За час беспарадкаў пацярпелі не менш за 55 супрацоўнікаў паліцыі.

Лаяльныя да ўладаў у Лондане пратэстанты, якія выступаюць за захаванне Паўночнай Ірландыі ў складзе Злучанага Каралеўства, некалькімі гадзінамі раней заклікалі ўдзельнікаў беспарадкаў праявіць павагу да брытанскай каралевы Лізаветы Другой ў святле смерці яе мужа прынца Філіпа. Аднак яны выступілі толькі за прыпыненне акцый і маюць намер аднавіць іх пасля перыяду жалобы ў каралеўстве.

Адной з падставаў да пачатку беспарадкаў стала пахаванне былога члена групоўкі "Ірландскае рэспубліканскае войска", у якім удзельнічалі высокапастаўленыя палітыкі з каталіцкай праірландскай партыі "Шын Фейн". Рашэнне пракуратуры не прыцягваць іх да адказнасці за парушэнне мер па барацьбе з каронавірусам выклікала незадаволенасць лаяльных Лондану пратэстантаў. Акрамя таго, частка пратэстанцкай абшчыны незадаволеная асаблівым статусам Паўночнай Ірландыі пасля выхаду Вялікабрытаніі з складу Еўрасаюза.

Тры дзесяцігоддзі міжабшчыннага канфлікту

Паўночная Ірландыя прайшла праз тры дзесяцігоддзі міжабшчынных канфліктаў, у выніку якіх больш за 3500 чалавек загінулі, каля 50 000 пацярпелі. Супрацьстаянне цэнтральных брытанскіх уладаў і мясцовых нацыянальных арганізацый, якія прадстаўлялі каталіцкае насельніцтва, было выклікана спрэчкай датычна статусу рэгіёну.

dw.com

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: