Удзельнікаў акцыі 8 лістапада масава выклікаюць у Генпракуратуру

Актывісты заяўляюць пра пагрозу рэпрэсій. Ціск пачаўся і на блогераў, якія заклікаюць на сённяшнюю акцыю ў Мінску.
Кастрычніцкая плошча 15 лістапада. Фота Аляксандр Лібертад

Кастрычніцкая плошча 15 лістапада. Фота Аляксандр Лібертад

Як паведамляюць у фэйсбуку актывісты, нявесце анархіста Дзмітрыя Паліенкі Анастасіі Гусевай учора патэлефанаваў маёр Усік Аляксандр Мікалаевіч з Цэнтральнага РАУС (запіс размовы). Таксама падобныя «запрашэнні» атрымалі некаторыя актывісты грамадзянскай кампаніі «Еўрапейская Беларусь».


Званок з прапановай прыйсці ў Генпракуратуру з нагоды акцыі 8 лістапада атрымаў і старшыня «Маладога фронту» Дзяніс Урбановіч, якога выклікаюць разам з братам Максімам. Пра гэта паведаміў «Новаму Часу» актывіст «Еўрапейскай Беларусі» Леанід Кулакоў, які размаўляў з Урбановічам па тэлефоне. Па словах Кулакова, браты Урбановічы вырашылі схадзіць на сустрэчу і пацікавіцца, чаго ад іх хочуць.

Апроч таго, Леанід Кулакоў, калі праходзіў міма Кастрычніцкай плошчы, убачыў, што ўлады ўжо падрыхтаваліся да маючай адбыцца сёння акцыі, на якую заклікалі лідары «Еўрапейскай Беларусі»: на плошчу прыгналі аўтазакі і кран.

Тэлефон самога Дзяніса Урбановіча не адказвае.

Паводле інфармацыі агенцтва «Мінск-Навіны», сёння на Кастрычніцкай плошчы ў Мінску збіраюцца ўстанавіць галоўную навагоднюю ялінку. Паведамляецца, што працы пачнуцца пасля 12-й гадзіны.

Як адзначае праваабарончы цэнтр «Вясна», ціск пачаўся і на блогераў, якія запрашаюць людзей выйсці на новую акцыю 15 лістапада. Так, супрацоўнікі міліцыі прыходзілі дадоуму да маці гомельскага блогера Сяргея Ціханоўскага — аўтара канала «Краіна для жыцця». Затым яго пільнавалі каля яго ўласнага дома. Ціханоўскі выйшаў у прамы эфір і распавёў пра тое, што адбывалася. Ён звязвае такую «актыўнасць» міліцыянтаў з тым, што ён заклікаў людзей прыходзіць на акцыю ў Мінску і сам збіраецца ехаць у сталіцу.

Таксама тэлефанавалі з пракуратуры блогеру Уладзіміру Цыгановічу (MozgON) і хацелі з ім паразмаўляць. Але Цыгановіч папрасіў накіраваць афіцыйны ліст, як належыць па законе. Блогер выказаў меркаванне, што гэта звязана з яго дзейнасцю.

А 13 лістапада з цягніка Брэст-Мінск у Баранавічах быў зняты актывіст Андрэй Шарэнда. Яго тры гадзіны трымалі ў пастарунку і апытвалі наконт закліку прыйсці на акцыю 15 лістапада, размешчанага на яго старонцы ў Facebook. 

Нагадаем, 8 лістапада на плошчы Свабоды ў Мінску адбылася акцыя, на якую заклікаў беларусаў блогер NEXTA дзеля абмеркавання яго фільма «Лукашэнка. Крымінальныя матэрыялы», што набраў каля 2 мільёнаў праглядаў. На акцыю прыйшлі некалькі соцень чалавек.

Палітычныя актывісты заклікалі людзей зноў выйсці на вуліцу 15 лістапада, гэтым разам збор прызначаны на Кастрычніцкай плошчы.

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Грамадства: галоўнае

Больш цікавага на «Новым Часе»: