Усе грошы сышлі на сілавікоў: у Светлагорску другі месяц не працуе адзіны КТ

Адзіны ў Светлагорскім раёне камп'ютарны тамограф не працуе з лютага. Нагадаем, што толькі КТ паказвае каронавірусную пнеўманію на ранніх стадыях.

Такая аб’ява — не рэдкасць у беларускіх медустановах. Ілюстрацыйнае фота


У Светлагорску з лютага не працуе тамограф, пацыентаў адпраўляюць у суседнія гарады. Міністэрства аховы здароўя пры гэтым запэўнівае, што пытанні падтрымання працаздольнасці медыцынскага абсталявання знаходзяцца на пастаянным кантролі, піша «Ранак».

Паводле паведамлення тэлеграм-канала «Афіцыйна Мінздароўя», па стане на 15 сакавіка на рамонце знаходзіцца 12 адзінак высокатэхналагічнага дарагога абсталявання, у тым ліку тамограф «AQUILION 64» вытворчасці «TOSHIBA», усталяваны ва УАЗ «Светлагорская ЦРБ».

Неафіцыйная інфармацыя, што адзіны ў Светлагорскім раёне камп'ютарны тамограф няспраўны і жыхары рэгіёна пазбавіліся магчымасці эфектыўнага пацвярджэння або абвяржэння кавіднай пнеўманіі, з’явілася ў сярэдзіне лютага.

Мужчына ў тэлефоннай размове скардзіўся, што ў яго лабараторна пацвердзіўся кавід, дыхаць цяжка, а «тамограф зламаўся і на просты рэнтген адпраўляюць».

Паводле інфармацыі сайта дзяржзакупак, заяўка на рамонт тамографа для Светлагорскай ЦРБ была размешчаная 12 лютага 2021 года.

У даведцы пазначана, што медыцынская ўстанова заключыла дамову на 6463,01 рублі з замежным унітарным прадпрыемствам па аказанні паслуг «Тэхмедсервіс Спектрыкс» з аплатай «па факце выкананых работ». Рамонт тамографа, мяркуючы па ўмовах аказання паслугі, павінен быць завершаны да 26.02.2021 года.

4 сакавіка на сайце дзяржзакупак з’явілася заяўка на «паслугі па тэхнічным абслугоўванні камп'ютарнага тамографа», падпісаная галоўным урачом УАЗ «Светлагорская ЦРБ» Л. А. Ярмоленка. Дагавор на аказанне паслугі на працягу года на суму 11 493,3 руб. быў таксама заключаны з «Тэхмедсервіс Спектрыкс».

16 сакавіка тэлеграм-канал «Афіцыйна Мінздароўя» паведаміў, што тамограф у Светлагорскай ЦРБ па-ранейшаму мае патрэбу ў рамонце. Гэтую інфармацыю ranak.me пацвердзіла крыніца ў Светлагорскай ЦРБ.

— Так, там вельмі сур’ёзная нейкая паломка, і нам сказалі, што яшчэ як мінімум месяц ён будзе ў рамонце. Бо наш тамограф апошні час эксплуатавалі ў кругласутачным рэжыме, вось і не вытрымала тэхніка... Людзей адпраўляюць на абследаванне ў Жлобін і Рэчыцу. У Рэчыцы, дарэчы, таксама на апошнім дыханні тамограф…

У офісе «Тэхмедсервіс Спектрыкс» па пытанні рамонту Светлагорскага тамографа парэкамендавалі звярнуцца непасрэдна да дырэктара прадпрыемства Зураба Маградзэ. Той выслухаў пытанне журналіста, сказаў, што нічога не ведае і папрасіў не тэлефанаваць яму больш.

Галоўны лекар УАЗ «Светлагорская ЦРБ» Людміла Ярмоленка не адказала на званкі і паведамленні журналіста ranak.me. Тэлефон кабінета РКТ Светлагорскай ЦРБ сёння таксама ўвесь дзень не адказвае.

— Пытанні падтрымання працаздольнасці медыцынскага абсталявання знаходзяцца на пастаянным кантролі Міністэрства аховы здароўя, — гаворыцца ў паведамленні тэлеграм-канала «Афіцыйна Мінздароўя». — Разглядаюцца штотыдзень (з асабістымі дакладамі кіраўніцтву Міністэрства аховы здароўя) пытанні працаздольнасці абсталявання і своечасовага сервіснага абслугоўвання і рамонту медыцынскага абсталявання, правядзення працэдур закупак запасных частак для аднаўлення абсталявання, якое выйшла з ладу, і забеспячэння аказання якаснага медыцынскага абслугоўвання насельніцтва.

Так, па стане на 15 сакавіка, на рамонце знаходзіцца 12 адзінак абсталявання. Гэта складае 5% парку — усяго ў краіне 260 адзінак высокатэхналагічнага дарагога абсталявання.

На сёння праводзяцца працэдуры дзяржзакупак запасных частак, неабходных для аднаўлення працаздольнасці медыцынскай тэхнікі. У сувязі з эпідэміялагічнай сітуацыяй у краіне і свеце ў 2020-2021 гадах павялічылася патрэба ў высокатэхналагічным медыцынскім абсталяванні.

Гэта прывяло да павышэння нагрузкі на абсталяванне і неабходнасці правядзення больш частых работ па замене іх вузлоў/модуляў. Зараз, у перыяд больш спакойнай эпідсітуацыі, арганізацыі аховы здароўя актывізавалі працу па тэхнічным абслугоўванні і рамонце медыцынскай тэхнікі.

Кабінет рэнтгенакампу'ютарнай дыягностыкі ў Светлагорскай цэнтральнай раённай бальніцы адкрыўся ў студзені 2013 года да 75-годдзя Гомельскай вобласці. 64-зрэзавы рэнтгенаўскі камп'ютарны тамограф фірмы «Toshiba» дазваляе атрымліваць больш выразныя і якасныя выявы, скараціць час на адно даследаванне, што, у сваю чаргу, зніжае прамянёвую нагрузку на пацыента.

На той час гэта быў адзіны ў Гомельскай вобласці апарат такога класа. Сродкі на яго закупку ў памеры 11,7 млрд. руб. (сума да дэнамінацыі) былі вылучаныя з абласнога бюджэту, яшчэ 2 млрд. рублёў (сума да дэнамінацыі) з раённага бюджэту былі выдаткаваныя на праектныя і будаўніча-мантажныя работы для рэканструкцыі і камплектацыі кабінета.



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: