Устаноўка помніка дзецям вайны ў Мёрах каштуе амаль удвая даражэй самой скульптуры

ЖКГ Мёрскага раёна абвясціла тэндар на ўстаноўку дэкаратыўнай скульптуры «Дзеці свету — дзецям вайны» і добраўпарадкаванне прылеглай тэрыторыі.
Арыенціровачны кошт гэтых работ, якія павінны быць выкананы да канца кастрычніка, складае 9661 рубель. Фінансавацца ўстаноўка помніка і добраўпарадкаванне тэрыторыі будзе з уласных сродкаў жыллёва-камунальнай гаспадаркі.

У Мёрах хочуць усталяваць кампазіцыю ў выглядзе разбуранай дзіцячай пляцоўкі: на пясочніцы размесцяць гранітныя кубікі і мячык, а зверху пасадзяць голуба — таксама з граніту. На гранях кубікаў збіраюцца выгравіраваць выявы цацак і літары, з якіх можна скласці слова «МІР». На двух ніжніх кубіках будуць пазначаны 1941 і 1945 гады.

На адзін з кубікаў на дзве грані нанясуць першы куплет песні «Несумяшчальныя дзеці і вайна»:

«Играют дети всей земли в войну,
Но разве о войне мечтают дети?
Пусть только смех взрывает тишину
На радостной безоблачной планете!

М. Садовский»

Новы манумент будзе вышынёй 2,4 метра і зойме плошчу 3 на 3 метры. Арыенціровачны кошт помніка — 4600 рублёў. Аднак тэндар на яго выраб не адбыўся, заяўкі прымаліся з 5 па 14 верасня.

Агульны кошт устаноўкі гэтай дэкаратыўнай скульптуры ў Мёрах, такім чынам, складзе 14 261 рубель.

«Народныя навіны Віцебска»


Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: