Вайна з паветранымі шарыкамі, пахаванне і рэпрэсіі. Найважнейшае за 24 жніўня

Чым далей — тым больш маразму ў дзеяннях уладаў. Канешне, некаторыя захады можна ацаніць як рацыянальныя, аднак збольшага ўлады «страляюць сабе ў нагу».


Міністэрства абароны падняло ў паветра баявыя верталёты, каб збіць паветраныя шары з бел-чырвона-белым сцягам, што запусцілі на тэрыторыі Літвы. Пасля выканаўца абавязкаў намесніка камандуючага Ваенна-паветранымі сіламі і войскамі супрацьпаветранай абароны палкоўнік Алег Арлоў паспрабаваў рацыянальна патлумачыць, што гэтыя шарыкі маглі ўяўляць небяспеку для грамадзянскіх паветраных судоў, а таксама «невядома, якое начынне ў тых шарыках».

Але ж ад пачатку Мінабароны адрапартавала, што збітыя яны былі таму, што неслі «антыдзяржаўную сімволіку».

МЗС Літвы кажа, што беларускія верталёты парушылі паветраную прастору нашай суседкі, і накіравала адпаведную ноту нашаму МЗС. Ведамства Макея будзе разбірацца.


У Жабінцы прайшло пахаванне 44-гадовага Генадзя Шутава, які памёр у ваенным шпіталі Міска пяць дзён таму. Мужчына атрымаў агнястрэльнае раненне ў галаву 11 жніўня ў раёне Маскоўскай адміністрацыі Брэста падчас пратэстаў. Следчы камітэт паведамляў, што падчас пратэстаў 11 жніўня яго «ненаўмысна паранілі ў галаву са зброі пры нападзе на асоб, якія выконвалі задачы па ахове грамадскага парадку».

Як можна «ненаўмысна» стрэліць у чалавека з баявой зброі на вуліцы горада, СК не тлумачыць. Горад жа — не цір, не паляванне і не зборка-разборка зброі.


АМАП зноў пачаў паляванне на людзей. Уранку на прахадной МТЗ затрымалі давераную асобу Святланы Ціханоўскай Вольгу Кавалькову і прадстаўніка страйкаму гэтага завода Сяргея Дылеўскага. Іх абвінавацілі ў арганізацыі несанкцыянаваных мерапрыемстваў. Увечары ў Мінску на плошчы Незалежнасці, дзе кожны дзень збіраюцца пратэстоўцы, АМАП таксама хапаў людзей.

Але беларусаў ужо не напалохаць — усё самае жудаснае яны ўжо бвачылі. Нягледзячы на затрыманне, акцыя адбылася — не такая шматлюдная, як раней, але тым не менш.


Следчы камітэт (той самы, які лічыць, што на вуліцах горада міліцыянты страляюць з табельнай зброі «ненаўмысна») даўмеўся выклікаць на допыт Святлану Алексіевіч, лаўрэатку Нобелеўскай прэміі, якая з’яўляецца сябрам прэзідыума Каардынацыйнай рады. Допыт звязаны з крымінальнай справай «па факце публічных заклікаў да захопу дзяржаўнай улады або здзяйснення дзеянняў, накіраваных на прычыненне шкоды нацыянальнай бяспецы».

Як казаў адзін генеральны пракурор: «Галоўнае ў працэсе следства не выйсці на саміх сябе». А гэта следчыя і зрабілі: цяпер чакаем рэакцыі Нобелеўскага камітэту і астатніх Нобелеўскіх лаўрэатаў (а гэта аўтарытэтныя людзі, да якіх прыслухоўваецца свет).

Як вы думаеце, ці не зрабілі следчыя тыя самыя «дзеянні, накіраваныя на прычыненне шкоды нацыянальнай бяспецы» Беларусі?



Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: